Ndryshime të mëdha po na zënë sytë në televizionin “Top Channel”, duke filluar nga programacionet e reja, largimet apo rikthimet e moderatorëve apo dhe vendosja në krye e Ben Blushit si Drejtori i Përgjithshëm.
Muajt e fundit televizioni ka qenë i hapur për negociata dhe rifreskimin e stafit. Fillimisht u largua Sokol Balla; u përfol për lëvizjen e madhe të Blendi Fevziut dhe Agron Llakajt në “Top Channel”; u rikthye Jonida Shehu pas lajmeve të bujshme që ajo ishte hedhur në gjyq nga televizioni dhe e fundit por jo më pak e rëndësishme: Po me Luanën çdo të bëhet?
Lajmi më i bujshëm ishte edhe ai i largimit të moderatorit Ledion Liço, i cili është njëkohësisht dhe partneri i Sara Hoxhës, njërës nga trashëgimtaret e Top Channel.
“Syri.net” shkruante se moderatori do të linte ekranin që e bëri të famshëm pas një zënke me drejtorin e ri, Ben Blushi. Ndër të tjera thuhej se Ledioni, i cili është partneri i trashëgimtares së TCH, synonte postin e drejtorit të përgjithshëm të televizionit dhe kjo ishte një ndër shkaqet e largimit të tij.
Por moderatori hodhi poshtë këto lajme si të rreme, ndërsa ne na shqetëson diçka tjetër. Në maj u përfol se shumë shpejt do të nisë formati më i ri i Big Brother, ai i të famshëmve, i cili do të mbajë autorësinë e Ledion Liços.
Kanë kaluar më shumë se 3 muaj dhe ende nuk kemi asnjë informacion në lidhje me këtë program.
Një tjetër projekt i mbetur pezull është ai i “Top Awards”.
Deri më tani dimë që ka pasur shumë artistë pretendentë për të konkurruar dhe klasifikime gjithashtu, megjithatë nuk dihet ende një informacion për datën e këtij eventi.
Këto projekte duket se kanë mbetur pezull pas ndryshimeve të mëdha me drejtimin e televizionit, ndërkohë që presim një rikthim të fuqishëm me sezonin e ri në shtator.
Burimi: Iconstyle.al
