Autoritetet rumune kanë konfiskuar koleksionin e makinave të personazhit të njohur të mediave sociale Andrew Tate dhe vëllait të tij Tristan. Kjo vjen disa ditë pasi 36-vjeçari i vetë-quajtur si “trajneri i suksesit” u arrestua si pjesë e një hetimi për trafikimin e qenieve njerëzore.
Autoritetet rumune konfiskuan koleksionin e makinave, që vlerësohet të jetë me vlerë mbi pesë milionë euro, si dhe një numër ndërtesash, duke përfshirë një ku jetonin vëllezërit dhe dyshohet se mbanin gjashtë vajza të reja, sipas një raporti të lajmeve lokale.
Një Buggati Chiron, një Rolls Royce, dy Ferrari dhe një Porsche ishin midis atyre që u kapën, sipas gazetës rumune “Spy News”. Andrew Tate shpesh mburrej në rrjetet sociale për makinat e shtrenjta dhe pasurinë e tij, madje disa kohë më parë u bë virale pyetja e tij: “Çfarë ngjyre është Buggati yt?”
Tate, i cili është ndaluar nga një sërë platformash të mediave sociale për shkelje të rregullave, u mburr për koleksionin e tij të makinave vetëm pak ditë më parë në një postim në Twitter që “shënjestronte” aktivisten e klimës Greta Thunberg (KLIKO). Përgjigja e saj u bë virale, duke mbledhur afro katër milionë pëlqime dhe 300 milionë shikime.
Ramona Bolla, e agjencisë kundër krimit të organizuar Diicot, tha se katër të dyshuar, përfshirë Tate, do të mbahen për 30 ditë pasi një gjykatës zgjati periudhën e tyre fillestare të paraburgimit prej 24 orësh. Bolla vuri në dukje se vendimi nuk ishte përfundimtar dhe të dyshuarit kanë të drejtë ankimimi.
