Sezonin e kaluar, Maria Grazia Chiuri dizajnoi për herë të parë për “Dior” bluzën me sloganin “Duhet të bëhemi të gjithë feminist”, që bëri bujë në botën e modës. Për koleksionin pranverë 2018, dizajnuesja vazhdoi me mesazhin e fuqizimit të femrës me një shkrim të ri.
Shfaqja u hap me një modele që mbante veshur një bluzë me vija bardhë e zi, në të cilën shkruhej: “Pse nuk ka pasur artiste të mëdha femra?”. Fillimisht ndjekësit ishin disi konfuzë për këtë pyetje të guximshme. Një bloger shkroi: “Mendoj se Frida Kahlo ose është mashkull ose nuk ishte e madhe…?”.
Por pyetja është në fakt titulli i një eseje të vitit 1971 të shkruar nga Linda Nochlin, e cila eksploroi historinë e artit feminist. Eseja shkruan për historinë e femrave që e kishin të vështirë të arrinin sukses në art, një industri që vazhdon të kontrollohet nga meshkujt.
Churi është drejtuesja e parë femër e “Dior” në 70 vite histori, kështu që fjalia merr akoma më shumë kuptim. Shënimet e lëna në ulëset e të ftuarve zbuluan se Chiuri ishte frymëzuar nga teoria feministe e Nochlin për koleksionin pranverë 2018.
“Është e nevojshme t’u japim këtyre artistëve të ndryshëm dhe të veçantë atë që meritojnë, sepse ata janë ata që e thyejnë ligjërimin tradicional mashkullor në historinë e artit dhe në modë”, shkroi dizajnuesja.
Burimi: Harper’s Bazaar
