Festa e bujshme me alkool dhe këngë e mjekëve shqiptarë në Itali, së cilës iu bë jehonë nga mediat, ka qenë thjesht një festë e vogël në momentin e marrjes së përgjigjeve negative të COVID-19.
Kështu është shprehur për ABC News infermieri Korab Gjana, i cili tha se në media u ekzagjerua dhe se bluzat e bardha po festonin për kthimin në shtëpi pranë familjeve të tyre.
“Reagimi i gazetave ishte shumë i ekzagjeruar sepse nuk ka qenë ashtu situata edhe pse s’kam qenë pjesë personalisht në ato momente. Momente gëzimi nga marrja e përgjigjeve negative të tamponeve Covid-19 ishte indicie për gëzim dhe kthimi në Shqipëri e pranë familjeve tona”.
“Nuk e hedhin dot poshtë punën tonë dhe përfaqësimin e vendit që bëri bujë sesi Shqipëria aq e vogël dhe e varfër arriti t’iu ishte pranë italianëve në këto ditë të vështira. Në dijeninë time kanë pasur vërejtje për zhurmën, por jo që janë gjobitur apo paguar gjobë”, shprehet Gjana.
Gjana tregon se pas kthimit në Shqipëri do të qëndrojnë të vetëkarantinuar për 14 ditë në shtëpi dhe më pas do të kthehet punës në urgjencës së Qendrës Spitalore Universitare.
“Në shtëpi të vetëkarantinuar. Pastaj do i rikthehem punës intensive ku punoj ndër-vite në urgjencën e QSUT-së! Përvoja profesionale është kyç në këtë situatë. Të përballesh me pacientë Covid-19 është një moment shumë i vështirë sepse risku për t’u infektuar është i lartë sepse gjatë gjithë kohës je i ekspozuar”, tregon ai.
Momenti më i bukur që ka lënë mbresa tek ai është padyshim momenti i nisjes në shtetin italian kur kishte më shumë nevojë:
“Momenti më i bukur është gjesti ynë që i erdhëm në ndihmë popullit italian atëherë kur kishte më së shumti nevojë. Momenti më i vështirë ishte kur punonim me pacientë te axhituar dhe ata që nuk e kontrollonin veten sepse rritej tej mase mundësia për infektim. Por kujdesi ynë maksimal tregoi që ia dolëm duke ruajtur veten dhe kolegët”, përfundon Gjana.
/abcneës.al
