Mjalti është një nga ushqimet më të vjetra në botë, dhe një nga të paktat që nuk prishet kurrë. Edhe pas qindra apo mijëra vitesh, ai mbetet i sigurt për konsum. Por cili është sekreti i këtij “ushqimi të përjetshëm”?
Ekspertët shpjegojnë se përbërja e tij natyrale është çelësi. Mjalti ka një përmbajtje të ulët uji dhe një nivel të lartë sheqeri, duke krijuar një mjedis ku mikrobet dhe bakteret nuk mund të mbijetojnë. Përveç kësaj, ai përmban substanca antibakteriale natyrale dhe ka një pH acid, që parandalon prishjen.
Edhe zbulimet arkeologjike e kanë provuar këtë fakt: në varret e faraonëve egjiptianë janë gjetur kavanozë me mjaltë që ishin ende të ngrënshëm, pas më shumë se 3 mijë vjetësh.
Pra, jo vetëm që është i shijshëm dhe i shëndetshëm, por mjalti është edhe një nga produktet më të qëndrueshme që ekziston në natyrë.
