“Sunny Hill Festival” u shndërrua në një fenomen mjaft të dashur në Kosovë. Shumë artistë të huaj dhe shqiptarë performuan në skenën e madhe dhe performancat e tyre ishin mjaft elektrizuese.
Mirëpo, tashmë “Sunny Hill” vjen edhe në Tiranë. Thuajse çdo gjë është gati!
Fati Gjakova , një prej organizatorëve të këtij festivali ka dhënë së fundmi një intervistë për Tv Klan. Ai ka thënë se skena zë një sipërfaqe prej 40 metrash katrorë.
“Jemi drejt fundit, po provojmë zërin. Është skena më e madhe në rajon, edhe më e madhe se ajo e Prishtinës, për vetë vendin që kemi këtu”, tha ai.
Festivali vijon tre ditë.
“Janë 40 këngëtarë vendas e të huaj. Duke filluar nga Fedez, Stormz”- vijoi më tej ai.
“Do të jetë cashless, pra nuk do paguhet me lekë, por nëpërmjet aplikacionit, që do jetë portofoli apo bracelets që e mbush në pika të vendosura”, dha një tjetër informacion organizatori.
Mirëpo janë disa gjëra që duhet t’i keni parasysh për ndjekjen e festivalit
Së pari, mosha minimale për ndjekjen e koncertit është 16 vjeç. Ata që janë nën këtë moshë, duhet të jenë patjetër të shoqëruar nga persona më të rritur.
Kur të futeni brenda, duhet të keni me vete Kartën ID ose pasaportën ashtu sikurse edhe biletën në mënyrë të printuar ose digjitale.
Por çfarë nuk lejohet të marrësh me vete? Pikërisht mjete të mprehta, ushqim dhe pije, produkte aerosoli (spraj), parfume, narkotikë ose substanca të ndaluara si dhe çakmakë.
