Hunda ishte gjëja e parë që më binte në sy sa herë që shihesha në pasqyrë apo bëja një fotografi. Nëse kishte dalë e madhe siç ishte, fotoja do të fshihej, por pasqyrës dhe syve të njerëzve nuk kisha çfarë t’ju bëja!
Shkëndija për të bërë operacion hundën më erdhi pasi pashë një shoqen time. Ajo kishte perfeksionuar pamjen dhe kjo ishte gjithçka që doja. Prindërit e mi nuk kishin mjaftueshëm të ardhura për ta bërë ta realizuar ëndrrën time, por duke parë dëshirën time të madhe dhe faktin që vërtet e kisha të nevojshme, atëherë ia dolën të mblidhnin shumën e duhur që unë të ndihesha e lumtur më në fund.
Tani që e shoh veten, jam kaq e lumtur që e bëra! Sërish hunda është gjëja e parë që shoh kur dal para pasqyrës, por jo sepse duket keq, përkundrazi. Megjithatë, nëse ndonjë nga ju ka vendosur që të bëjë ndërhyrje në hundë, ose rinoplastikë siç quhet në gjuhën e mjekëve, duhet të dijë disa pika kyçe që i përjetova vetë. Më poshtë janë disa informacione që do të doja të m’i kishin thënë para se të bëja hundën:
Do të ketë shumë dhimbje
Kur del narkoza pas operacionit, është normale të kesh dhimbje. Unë personalisht pata shumë dhe dhimbja u shoqërua edhe me të vjella. Megjithatë jo të gjithë e përjetojnë njësoj, pasi një miken time e kapi paniku dhe filloi edhe të gjuante mjekët pasi i doli narkoza dhe nuk ishte fare për të qeshur.
Është e vështirë të ushqehesh
Pas daljes nga operacioni zgavrat e hundës do të jenë të mbushura me pambuk, gjë që e bën të vështirë të ushqehesh. Duhet të marrësh frymë vetëm me gojë dhe është e vështirë veçanërisht në fillim. Heqja e pambukut më pas është dhimbje me vete.
Rezultati nuk është gjithmonë ai që pret
Hunda perfekte mund të mos jetë e mundur. Çdo hundë ndryshon nga një njeri tek tjetri dhe ti mund të mos kesh strukturën e kockave të njëjtë me atë të Bella Hadid.
Mund të mos të të pëlqejë aspak hunda e re
Nuk mund ta shohësh rezultatin menjëherë. Reagimi ndryshon nga pacienti në pacient, por ajo që me siguri të gjithë shohin në fillim është nxirja dhe enjtja. Megjithatë mos u shqetësoni! Me pushimin e duhur, anti-inflamatorët dhe mbajtjen e kokës ngritur, do të shihni që ënjtja zhduket brenda një jave apo më shumë. Ju duhet të shmangni aktivitete të fuqishme për të paktën muajin e parë dhe forma e vërtetë e hundës do të shihet pas disa muajsh.
6 muaj nuk duhet të mbash syze
Duket një kohë e gjatë veçanërisht nëse mendon të bësh ndërhyrjen tani në verë. Për 6 muaj nuk duhet të vendosësh syze optike apo dielli, pasi deformohet kurrizi i hundës. Edhe nëse i vendos, mos i lër për një kohë të gjatë.
Njerëzit do ta vënë re dhe mos u mundo kot ta fshehësh
Nëse rezultati është ai që doje dhe ti ndihesh mirë me veten tënde, nuk ka asnjë arsye të ndihesh në siklet. Detyra e njerëzve është të flasin, dhe nëse ta thotë në sy ndonjë vajzë që të ka zili, hidhi një sy hundës së saj dhe ajo s’do ta zgjasë më!
Burimi: Iconstyle.al
Për t’u njohur të parët me lajmet më të fundit nga showbiz-i, moda, bukuria, aktualiteti etj., shkarkoni falas aplikacionin e iconstyle.al
iOS: (Kliko Këtu)
Android: (Kliko Këtu)
