Ditën e sotme, Komiteti Teknik i Ekspertëve njoftoi masat e reja kufizuese anti-Covid për dy javët në vazhdim. Ministrja e Shëndetësisë dhe Mbrojtjes Sociale Ogerta Manastirliu bëri me dije se do të ndalohen lëvizjet nga ora 20:00 e mbrëmjes deri në orën 06:00 të mëngjesit, për dy javë.
Një ndryshim tjetër është dhe zhvillimi i mësimit online në gjimnaze, pas konstatimit të infektimeve në këto grupmosha.Gjithashtu u njoftua ndalimi i aktiviteteve të bareve, restoranteve, klubeve, nga ora 20:00 e mbrëmjes – 06:00 të mëngjesit (me përjashtim të shërbimit delivery), duke filluar nga dita e enjte, datë 11 Shkurt – 25 Shkurt. Për universitetet, të cilat prej javësh tashëm po e zhvillojnë online mësimin, masat do të vazhdojnë të njëjta. Sezoni i provimeve do të zgjatet për të siguruar kombinimin e provimeve online dhe në auditor, për lëndët që kërkojnë prezencë
Disa nga masat e Komitetit Teknik të Ekspertëve:
– Ndalimi i qarkullimit të lëvizjes për qytetarët nga ora 20:00 e mbrëmjes – 6:00 të mëngjesit, me përjashtim të emergjencave shëndetësore dhe për arsye pune (në këtë rast është e domosdoshme leja nëpërmjet aplikimit tek e-Albania) për një afat 14 ditor, duke filluar nga dita e enjte, datë 11 Shkurt – 25 Shkurt.
– Ndalimi i aktiviteteve të bareve, restoranteve, klubeve, nga ora 20:00 e mbrëmjes – 06:00 të mëngjesit (me përjashtim të shërbimit delivery), duke filluar nga dita e enjte, datë 11 Shkurt – 25 Shkurt.
– Nisur nga rritja e rasteve të infektimeve të reja në grupmoshën 15-24 vjeç, shkollat e mesme do të aplikojnë skenarin e tretë, pra atë online ne zonat e riskut të lartë, ku përfshihen bashkitë: Tiranë, Fier, Vlorë, Berat, Durrës, Gjirokastër, Lezhë, Lushnje, Pogradec dhe Kamëz, për periudhën 11 shkurt – 26 shkurt.
– Sezoni i provimeve për universitetin do të zgjatet, për të siguruar kombinimin e provimeve online dhe në auditor, për lëndët që kërkojnë prezencë, sipas vlerësimit të MASR, duke zbatuar rreptësisht protokollet AntiCovid.
Mirëpo, a zbatohen nga të gjithë këto masa?
Siç e kemi parë edhe më herët, pavarësisht masave kufizuese që supozohet të jenë vendosur për të gjithë personat e subjektet, disa lokale e restorante në Tiranë, Durrës, plazh, Korçë etj, ‘kanë futur mik’ për qeverinë dhe kanë vazhduar të qëndrojnë të hapura pavarësisht situatës delikate në të cilën jemi.
Aktiviteti i tyre ka vazhduar normalisht edhe pas fashës orare të ndaluar me ligj dhe njerëzit kanë vazhduar të grumbullohen duke vendosur në rrezik jetën e tyre dhe të personave të tjerë me të cilët kanë kontakte.
Corona “ka hedhur valle” në këto lokale, ndërkohë që pjesa tjetër e tyre po falimenton për shkak të mbylljes. Që këto masa të kenë efekt, duket të zbatohen nga të gjithë dhe jo të bëhet një vesh shurdh e një sy qorr për një pjesë të subjekteve.
Përveç rrezikut të përhapjes së virusit, po bëhet gjithashtu një konkurrencë e pandershme mes bizneseve.
Kemi parë shpesh se si policia nuk ka marrë asnjë lloj mase ndaj disa biznesve që kanë shkelur të gjithë rregullat e pandemisë, duke nisur nga shkelja e orarit e deri tek mosrespektimi i distancës. Lidhja e drejtpërdrejtë e disa biznesmenëve me qeverinë apo edhe dhënia e parave nën dorë, i ka lejuar shumë prej tyre të vazhdojnë të lirë aktivitetin. Nga ana tjetër ata më “të dobëtit” nuk kanë mundur të bëjnë asnjë lloj manovre.
Orari i kufizimit ka ndikuar në thellimin e krizës ekonomike të këtyre bizneseve, ndërsa shteti shqiptar nuk dha e nuk vazhdon të japë asnjë lloj ndihme për t’ia lehtësuar sadopak vështirësitë e tyre financiare.
Në vend ka rreth 14 mijë bare dhe rreth 4 mijë restorante, duke na bërë ndër të parët në botë për numrin e lokaleve në raport me popullsinë, por njëkohësisht këto janë edhe fronti më i madh privat i punësimit të individëve.
Një mbyllje e dytë do të ishte shkatërruese për të gjithë këtë ekonomi, por edhe për atë të përgjithshme të vendit.
Parashikimet e Shoqatës të Bareve dhe Restoranteve për një “lockdown” të dytë janë për falimentim të 30% të strukturave të këtij shërbimi në Shqipëri. Kryetari i shoqatës, Enri Jahaj, ka paralajmëruar më herët nisjen e protestave, nëse ata nuk do të mbështeten financiarisht nga qeveria.
“Nëse bëjmë retrospektivë, duke parë situatën e infektimeve në fillimet e pandemisë ishim të parët që propozuam mbylljen e bareve dhe kur doli vendimi i muajit mars, rezultonte se gjysma e bizneseve ishin mbyllur. Nga ana tjetër, shumë biznese ende nuk kanë përfituar ndihmën financiare të premtuar nga qeveria, madje shumë prej tyre iu është refuzuar aplikimi për arsye nga më absurdet. Kur ne kërkonim hapjen dhe lehtësimin e masave, ishim të fundit që u dëgjuam dhe përgjigjja që na erdhi nga institucionet ishte, se qeveria ka bërë këtë dhe atë për tërmetin dhe pagat e luftës.
Propagandë, e asnjë zgjidhje. Në kushtet ku po bëjmë biznes, një kufizim pa asnjë lloj ndihme do të ishte katastrofik për të gjithë biznesin HoReCa, duke mos na dhënë asnjë lloj zgjidhje tjetër, përveç daljes në rrugë dhe kërkimit të të drejtave për investimet tona, që të kemi sadopak dinjitet ne dhe stafi ynë”.
/Iconstyle.al
