Nëse ka një ushqim që të gjithë njerëzit kudo në botë e duan kaq shumë janë: PICAT. Dhe për më tepër nuk na mërzitet kurrë, pavarësisht se mund të jetë zgjedhja jonë në çdo vakt.
Nuk ka shumë mënyra për të bërë brumin e picës, por çfarë është karakteristike e këtij restoranti në Gjermani, është hedhja e brumit në ajër dhe spërdredhja me mjeshtëri.
Tradita e nisur në Napoli të Italisë është përhapur tashmë në të gjithë botën dhe dy vëllezërit shqiptarë nga Tirana e çuan në vendin ku jetojnë, në Berlin.
Hapja e brumit në këtë mënyrë konsiderohet një shfaqje, ndaj klientët mbajnë gati telefonat në duar për të regjistruar spektaklin me brumë, që kanë për t’i ofruar dy vëllezërit nga Tirana, Rigerti dhe Toni Karaj.
Ky i fundit e nisi eksperiencën e tij në këtë fushë 20 vite më parë, ndërsa vëllai më i vogël vendosi që të ndiqte pas disa vitesh gjurmët e të madhit, tashmë në restorantin “Da Vincenzo”.
Rigerti kujton për “Iconstyle.al” vështirësitë e jetës së tij në vitet e para në Gjermani, duke treguar sesa të prekshme kanë qenë për të historitë e vuajtjeve të personazheve publik si, balerini shqiptar i njohur në Itali, Kledi Kadiu.
“Të gjithë kishim punë të dorës së dytë nëpër kuzhina apo në ndërtim”, tha Kadiu pak kohë më parë gjatë një interviste me BBC.
Rigerti ka pasur të njëjtën eksperiencë me kuzhinën, që tashmë është kthyer në përkushtimin dhe “dashurinë” e tij.
“Kur erdha në Gjermani e kisha shumë të vështirë të gjeja një punë, nuk dija gjuhën dhe ende nuk kisha një zanat. Kontaktet e para me kuzhinën nuk kanë lidhje me atë që bëj sot. Por vetëm me vullnet arrita që të kaloja nga aty ku isha te këtu ku jam sot. Nuk është e lehtë për një shqiptar, që nuk i ofrohen shumë mundësi dhe i mbyllen shumë dyer”, kujton picajoli.
Në videot e publikuara në faqen e tij “Pizzaiolo Show”, duket sesa të impresionuar dhe kuriozë janë për këtë shfaqje.
Në fakt xhonglimi i brumit është një mënyrë perfekte për të argëtuar klientët, të cilët presin që t’u vijë porosia. Është si një kënaqësi e dyfishtë.
“E fillova si një lojë me brumin. Por ngadalë-ngadalë pashë që njerëzit e pëlqenin, e shikonin si një spektakël. Kështu vendosa që veç përgatitjes së picave të shijshme, t’i argëtoja”, tregon Rigerti.
Fama e dy vëllezërve shqiptarë në Berlin ka nisur vite më parë, ndërsa të dy u ftuan në janar të 2016-s në emisionin gjerman “TV Sat 1”, për të treguar talentin e tyre.
Toni dhe Rigerti treguan aftësitë e tyre në spërdredhjen e brumit dhe në realizimin e picave të veçanta.
Picajoli Rigerti tregon se hapja e brumit në këtë mënyrë nuk është thjesht spektakël apo për t’u dukur. Por në atë mënyrë e oksigjenon dhe e bën më të lehtë për t’u pjekur.
Kështu që nëse ndodheni në Berlin dhe doni një picë të shijshme dhe një shfaqje falas, mund të flisni vetë me të.
