Ky vit ishte i mbushur me dashuri të reja dhe shumë celebrime. “Iconstyle.al” risjell në vëmendje të gjitha lidhjet e reja ose ato që u zbuluan gjatë 12 muajve të 2018-s. Disa prej tyre ende nuk e kanë pranuar romancën, madje disa e kanë mohuar. Ne kujtuam plot 7 çifte:
Fatma Methasani dhe Alfio Rrotani
Pavarësisht se kanë dy vite bashkë, Fatma dhe Alfio vendosën që ta bënin publike lidhjen vetëm më 8 tetor të këtij viti me foton më lart. Ata kanë treguar se janë prezantuar te familjet e njëri-tjetrit dhe duket se gjithçka po bëhet serioze.
Eni Koçi dhe Genc Prelvukaj
Prej disa muajsh Eni Koçi dhe Genc Prelvukaj po përfliten për një lidhje dashurie, mirëpo asnjëri prej të dyve nuk e pranoi kurrë publikisht deri më 17 dhjetor. Ishte eventi “Op Labi party 2019” i organizuar në Kosovë ku Eni dhe Genci u shfaqën duke hyrë të kapur për dore dhe Genci pranoi për herë të parë lidhjen e dashurisë. “Kemi zgjedhur një event si ky që të shfaqemi publikisht bashkë”, u shpreh reperi për emisionin “1 Kafe me Labin”.
Fero dhe Arbenita Ismajli
Fero po shijon një romancë me modelen seksi Arbenita Ismajli dhe lidhja u vërtetua falë postimeve në Instagram. Postimet e secilit në rrjetet sociale konfirmuan se Fero dhe Arbenita janë çifti më i ri i shoëbiz-it në tetor të 2018-s. Fotot e publikuara nga e njëjta vendndodhje dhe komentet në postimet e njëri-tjetrit zbuluan lidhjen e çiftit.
Flori Mumajesi dhe Kejsi Tola
Që nga pjesëmarrja e saj në festivalin “Kënga Magjike”, Kejsi Tola nuk pushonte me falënderimet për kompozitorin e këngës, pra për Flori Mumajesin. Në “E diela Shqiptare” më 9 dhjetor, teksa shprehte vlerësimin ndaj tij, Flori u përgjigj: “S’ka problem, më ke mua”.
Të gjithë mbetëm pa fjalë, kur Flori nuk e la vetëm dhe vrapoi drejt saj të vallëzonte në skenën e “E diela Shqiptare”. Vështrimet që ata i hidhnin njëri-tjetrit gjatë vallëzimit, dukeshin aq të ngrohta si të ishin të dashuruar. Nuk mbaron me kaq, këngëtari publikoi foton ku kapeshin dy duart e tyre, ndërsa lart shkruhej një pjesë e tekstit të këngës.
Vijojmë! Flori publikoi në “Insta Story” një foto të Kejsit, duke buzëqeshur nga studio, të cilën e shoqëron me emoji-n e një zemre.
Mediat online raportuan në dhjetor se, çifti kishte rreth gjashtë muaj së bashku dhe janë treguar tejet diskretë. Nga ana tjetër, fakti që ata nuk reagojnë për lajmet në media, nënkupton se diçka po kurdiset. Deri më tani askush nuk ka konfirmuar asgjë!
MC Kresha dhe Evi Reçi
“Iconstyle.al” zbuloi më 26 dhjetor se reperi nga Kosova, MC Kresha është në një lidhje me një këngëtare të njohur shqiptare: Evi Reçin! Burime për “iconstyle.al” u shprehën se, ata kanë vendosur që ta mbajnë lidhjen larg vëmendjes së publikut dhe pavarësisht se MC Kresha jeton në Kosovë dhe Evi Reçi në Itali, marrëdhënia e tyre thuhet se i mbijetoi distancës. Pasi lajmi u publikua, ishte vetë këngëtarja që vendosi të reagonte për “iconstyle.al” duke përgënjeshtruar faktin që mes tyre ka një lidhje.
Në një prononcim për redaksinë tonë për marrëdhënien e saj me MC Kreshën, Reçi u shpreh: “Nuk e di si qarkulloi ky lajm, por di që nuk është i vërtetë. Një gjë e tillë nuk ekziston. Më duhet ta përgënjeshtroj”.
Albi Nako dhe Alba Hoxha
Dyshimet e para për lidhjen e tyre nisën në maj të 2018-s, por pavarësisht se kanë kaluar muaj askush prej tyre nuk e zyrtarizon lidhjen. Madje Ali dhe Alba e kanë mohuar lidhjen, duke u shprehur se janë vetëm kolgeë, por mes tyre nuk ka asgjë më shumë. Nga ana tjetër burime për “iconstyle.al” konfirmuan muaj më parë se, çifti është në prag të fejesës dhe familjet e tyre janë prezantuar me njëra-tjetrën.
Kledi Bahiti dhe Krusita
Gjatë konkurrimit në “Kënga Magjike”, ku u vlerësua edhe me çmimin “Best Artist to Invest”, këngëtarja Krusita u përfol se është në një lidhje dashurie me kompozitorin e këngës Kledi Bahiti. Ata shiheshin shumë pranë njëri-tjetrit në provat e “Kënga Magjike”, çka solli dyshimet se zërat janë të vërtetë. Mirëpo, në emisionin “Pop Culture” e pyetur nëse është në një lidhje, Krusita refuzoi të jepte një përgjigje. Këngëtarja e kaloi duke buzëqeshur pyetjen!
