Në ditët e sotme, shumë njerëz i janë kthyer operacioneve plastike për të patur imazhin, që kanë ëndërruar gjithmonë për veten.
Ky trend ka vite që është përhapur, edhe në vendin tonë të vogël madje. Shumë këngëtare, modele apo personalitete të ndryshme kanë bërë ndërhyrje në hundë, buzë, mollëza etj.
Buzëve ama, keni mundësinë t’i bëni edhe ndërhyrje të përkohshme. Por, një pyetje i mundon të gjithë ata që i kanë bërë dhe duan t’i rikthehen natyralitetit apo ata që duan t’i bëjnë, por kanë frikë nga pasojat.
A kthehen buzët në madhësinë dhe formën e tyre origjinale pasi t’ju dalë mbushja artificiale, apo ekziston rreziku për humbjen e volumit? Sipas ekspertëve të fushës, nëse mbushja nuk është e përhershme, buzët do të kthehen në formën e tyre origjinale, shkruan “Shije”.
Mesatarisht, mbushjet janë të predestinuara të zgjasin gjashtë deri nëntë muaj, por meqenëse buzët janë në lëvizshmëri në baza ditore, buzët do të kthehen ngadalë në formën e tyre të mëparshme, pa e humbur origjinalitetin e tyre.
Por, jo gjithmonë mbushja është cilësore apo injektohet në mënyrë korrekte, prandaj duhet patur kujdes. Është gjithashtu e rëndësishme që mjeku t’i masazhojë buzët për të parandaluar ndonjë deformim të tyre, prandaj për ju që e keni në plan këtë ndërhyrje, sigurohuni që të bëni sa më shumë kërkime dhe bëhuni specifikë në kërkesat tuaja, që të keni rezultat sa më të mire. Injektimi në brendësinë e buzëve dhe në vijën përkufizuese është çelësi për rezultate natyrale.
