Që prej protestave studentore në 2018 në Paktin për Universitetin u parashikua granti i bursave për studentët ekselentë dhe kategorive në nevojë.
Rama deklaroi askohe në një konferencë për shtyp se studentët ekselentë dhe ata në nevojë do përfitojnë arsimim falas si dhe do përfitojnë bursa mujore. Ja çfarë parashikohet në vendimin nr. 903, datë 21.12.2016 të Këshillit të Ministrave “Për përcaktimin e kritereve për përfitimin e bursave nga fondi i mbështetjes studentore për studentët e shkëlqyer, studentët që studiojnë në programe studimi në fushat prioritare dhe studentët në nevojë”, i ndryshuar;
Përkrahja:
Studentët nga familje në ndihmë ekonomike, si edhe të verbrit dhe studentët paraplegjikë e tetraplegjikë, përfitojnë financimin 100% të tarifës së regjistrimit. Studentët nga familje me ndihmë ekonomike, të verbër, paraplegjikë e tetraplegjikë përfitojnë bursë 10.000 lekë në muaj.
Ekselenca:
Studentët me notë mesatare mbi 9, në çdo program studimi, përfitojnë financimin 100% të tarifës së regjistrimit, nga tarifë e plotë që paguanin përpara këtij vendimi. Studentët me notë mesatare mbi 9, në çdo program studimi, përfitojnë bursë 10.000 lekë në muaj, ndërkohë që kjo masë ishte në nivelin 8,100 lekë dhe vetëm për studentët me mesatare 10.00.
Ditën e djeshme ju raportuam se ndonëse shpërndarja e burasve duhet të ishte bërë me kohë, diçka e tillë nuk ka ndodhur. Pasi ky shqetësim u bë madhor, në mbrëmje Universiteti i Tiranës u vu në lëvizje duke shpallur listat e studentëve që janë përfitues të bursës.
Brenda kësaj jave 3667 studentë të Universitetit të Tiranës mund të tërheqin bursat e studimit, pasi u shpallën fitues të tyre. Lajmin e konfirmoi Rektorati UT, nëpërmjet zyrës së Financës.
“Janë 1636 studente kategori nevoja ekonomike me efekt financiar 147.510.000 leke dhe 2031 studente me nota 9-10 me efekt financiar 182.790.000 leke.. Ndërkohë në total 3667 studente me efekt 330.300.000 leke”, sqaroi financieri i Rektoratit të UT-së për ABC News. “Më datë 5 janar erdhi transferta nga Ministria e Arsimit dhe po atë dite u bë mbledhja e bordit të UT dhe u dërgua në MASR dhe MFE.. Sot bëhet çelja e fondit në thesar dhe për pune orësh do fillojë pagesa për muajt nëntor-dhjetor 2020”, tha më tej Lapraku.
Por, nëse jeni fitues, si të aplikoni?
Emri i fituesve të bursës mujore është publikuar në faqet zyrtare të fakulteteve përkatëse. Për shkak të pandemisë aplikimi dhe procedurat e nevojshme për përfitimin e bursës do bëhet online.
Pasi të keni hapur një llogari bankare në bankën përkatëse (ose mund të përdorni edhe një llogari aktive), ju duhet të plotësoni të dhënat në linkun e vendosur në dispozicion nga fakulteti juaj. Pasi të klikoni ju shfaqet një faqe e tillë, ku duhet të vendosni të dhënat e kërkuara.
Më pas për të tërhequr shumën duhet të paraqiteni në bankën përkatëse, pasi të jetë bërë transferimi i parave.
Ndërkohë auditoret e Universiteteve do vijojnë të qëndrojnë të mbyllura deri në një urdhër të ri të Komitetit të Ekspertëve dhe mësimi do zhvillohet vetëm online.
