Një ngjarje tronditëse po aq sa edhe prekëse e zgjoi sot vendin tonë. Petrit Jaupaj, mësuesi 63-vjecar nga Ballshi vrau veten pranë varrit të gruas së tij, pasi nuk mund të përballonte mungesën e saj.
Para më shumë se një viti, bashkëshortja e tij u nda nga jeta nga një sëmundje e rëndë. Nga dhimbja e boshllëku që la në zemrën e tij, Jaupaj, mësues i biokimisë në gjendje të rëndë emocionale, i dha fund jetës me fotoksinë pranë varrit të saj.
Ngjarja tronditi gjithë opinionin publik dhe jo vetëm. Për të kanë reaguar edhe personazhe publik. Aktorja Arjola Demiri, në një postim në InstaStory e saj shkruan se ky lajm e ka trishtuar por i ka dhënë edhe një mesazh të vyer.
“Histori nga ato që të lënë pa frymë. Histori dashurie që të bëjnë të besosh se dashuria ekziston vërtet. E trishtë, po njëkohësisht e jashtëzakonshme vetëflijimi prej dhimbjes së humbjes. Mendoja se vdekja i ndanë njerëzit! Por mesa duket edhe i bashkuaka shpirtrat. Asgjë për të paragjykuar! Ky burrë zemërthyer ma ndryshoi pak shijen që kam për burrat shqiptarë, që në dukje janë të vrazhdë dhe që nuk dinë të dashurojnë bukur. Pushoni në paqe”, ka shkruar Arjola.
Mësohet se Petrit Jaupaj ishte mësues i lëndës së Bio-Kimisë në shkollën 9-vjeçare “5 Shkurti” të Ballshit. Trupi i 60-vjeçarit është dërguar në morgun e Spitalit Rajonal Fier, për kryerjen e ekspertizës mjeko-ligjore.
