Një ngjarje e rëndë u shënua mëngjesin e sotëm në Berat, pasi një çift bashkëshortësh u gjet i vdekur në rrugë, poshtë pallatit ku banonte.
Viktimat janë identifikuar si, Kujtim dhe Këze Agalliu, prindër të 4 fëmijëve, 3 djem dhe një vajze, të cilët jetojnë jashtë shtetit.
Dyshimet flasin se bashkëshortët u hodhën nga kati i gjashtë i pallatit, ndërsa banorët kanë dhënë dëshmitë e tyre.
“Pamë që plaku e shtyhu gruan dhe pak sekonda më vonë u hodh dhe vet”, kjo ishte dëshmia tronditëse e një prej dëshmitarëve të ngjarjes së rëndë.
Banorët e zonës rrëfejnë se e gjithë skena ndodhi në pak sekonda, sipas dëshmive të marra nga “BalkanWeb”. Çifti kishte pak muaj që ishte transferuar nga fshati Qereshnik në qytetin e Beratit, në një pallat të ri në zonën e quajtur ‘Pjeshkore’ në lagjen ’30-Vjetori’.
Po ashtu mësohet se burri vuante nga probleme të shëndetit mendor, ndërsa merrte edhe mjekime, ndërkohë që gruaja e tij Këzja, ishte operuar dy herë për shkak të një sëmundje të rëndë. Burime policore për “BalkanWeb” bëjnë me dije se ka dyshime që ngjarja në fjalë ishte e planifikuar nga çifti, pasi ata nuk donin që të jetonin në qytet, por në fshatin e tyre.
Por duke qenë se fëmijët e tyre, 3 djemtë dhe vajza jetonin jashtë shtetit, çiftit iu kishin blerë një apartament dhe i kishin transferuar në Berat. Ndonëse burrë e grua jetonin vetëm, ata kishin edhe një shërbyese, e cila ju vinte në ndihmë.
