Ditën e sotme, në emisionin “Historia ime” preku publikun rrëfimi i një gruaje 35-vjeçare të quajtur Suzana.
35-vjeçarja ishte braktisur nga bashkëshorti kur ajo i kishte treguar se djali i tyre 2 muajsh ishte diagnostikuar me paralizë cerebrale.
Burri kishte kërkuar menjëherë divorcin pasi kishte mësuar sëmundjen e të birit, duke e lënë të vetme Suzanën me fëmijën e sëmurë.
Në studio ajo rrëfeu vështirësitë dhe sakrificat për të rritur e vetme të voglin, ndërsa Mirela Milorit iu mbushën sytë me lot.
“Punoj në rrobaqepsi, 8 orë janë oraret bazë, punoj dhe me orë shtesë, që të arrij të marr diçka më shumë. Shkoj në shtëpi merrem me çunin. Më pret duke qeshur sa më dëgjon zërin. Se kur i flet arrin të kuptojë, kur je e mërzitur, ai i mërzitur, kur i qesh fillon qesh dhe ai. Natën pastaj prapë rri me të, sidomos fillimet kanë qenë dhe natë dhe ditë i rrija pranë, se nuk e zinte gjumi nga krizat. Tani kanë rënë, por prapë ka ato shqetësimet e veta.”- rrëfeu gruaja nga Tepelena.
“Do ta vazhdoj rrëfimin natyrisht me Suzanën, por të marrim pak veten se na emocionove!”- u shpreh gazetarja me lot në sy pas rrëfimit të 35-vjeçares.
