Britney Spears duket se i është rikthyer të kënduarit publikisht për herë të parë në 13 vjet.
Spears ka postuar një video në llogarinë e saj në Instagram në të cilën shfaqet duke kënduar këngën e saj më të njohur.
Këtë herë ‘Baby One More Time’ u bë zëri i këngëtares për të shprehur abuzimin që ka pësuar nga babai dhe industria e muzikës gjatë viteve të kujdestarisë.
Duke i kënduar hitit të saj një version më të qetë me tekste të ndryshme, artistja shpjegoi përmes Instagramit se kjo ishte hera e parë pas shumë kohësh që ajo kishte kënduar.
“Kjo isha unë dje, duke larë rrobat,” tha Spears. “Ka kaluar një kohë e gjatë që nuk e kam ndarë zërin tim me fansat, ndoshta shumë gjatë, dhe ja ku jam duke luajtur nëpër shtëpinë time me një version tjetër të “Baby””.
Por komentet e Spears nuk u ndalën me kaq. Këngëtarja u hap para fansave të saj dhe rrëfeu historinë e errët që qëndron pas këtij versioni të ri: “Kam kërkuar ta bëj sepse kam 14 vjet që dua ta bëj. Një version ndryshe i ‘Baby’, që producentët të punojnë vërtet mbi të, por ekipi tha jo”, shpjegoi artistja.
Ajo shtoi se në këmbim i kanë ofruar një remix së bashku me katër vajza të tjera, njëra prej tyre motra e saj.
Artistja përfundoi duke thënë se ka vendosur ta shpërndajë këtë video sepse është plotësisht e vetëdijshme se “pasioni i saj është të kënduarit”, por që me kalimin e viteve familja e saj e ka bërë të ndihet “qesharake” dhe se tani ajo nuk do të jetë më “ viktima”.
