Erdhi e marta dhe sot mund të mësoni tre trende të tjera të sezonit.
Javën e kaluar në rubrikën tonë ishte pjesë stilistja e njohur, Stela Sallaku. Ajo ndau me ne 3 detajet dhe aksesorët e saj të preferuar dhe tani është momenti të shihni 3 trende të tjera.
Kush më mirë sesa një blogere mode në Shqipëri mund të na tregojë se, cilat janë gjërat për të cilat duhet të investojë çdo femër këtë sezon?
Në rubrikën e kësaj jave do të sjellim këshillat e Odeta Banushajt e cila tregoi për ne 3 veshjet/aksesorët e saj të preferuar për këtë sezon që do t’i shohim në dollapin e saj.
Kapelet
Nuk ka rëndësi nëse janë me strehë, sportive apo në ngjyra të ndryshme, kapelet janë të preferuarat e fashionistave shqiptare dhe të huaja këtë periudhë.
Mjafton t’i kombinoni siç duhet dhe do të dukeni vajza më “cool” e momentit.
Palltot e gjata
Një pallto nuk del kurrë nga moda, por këtë vit sugjerohen sa më të gjata. Palltot e gjata gëzojnë reputacionin më të madh të momentit si palltoja më “in” e këtij sezoni.
Duken plot stil edhe nëse i vesh me një palë xhinse dhe atlete, janë të duhurat për t’u veshur edhe me fund të shkurtër apo fustan. Një të tillë duhet ta keni se s’bën këtë sezon.
Kambalet
Nëse ka një aksesor që nuk do të donim ta hiqnim nga këmbët këto ditë të ftohta, ato janë pikërisht kambalet. Kambalet janë zgjidhja ideale për t’u përballur me motin e keq dhe mbi të gjitha kombinohen me çdo stil. Odeta ka zgjedhur një palë të bardha dhe ato sapo u kthyen edhe në të preferuarat tona.
