Shkrimtari shqiptar, Ismail Kadare, na bëri sërish krenarë pasi mori çmimin ndërkombëtar “Nonino 2018” në Udine, të Italisë. Kadare është vlerësuar së bashku me filozofin italian Giorgio Agamben nga një juri e autorizuar drejtpërdrejt nga “Nobel”.
Edicioni i 43-të i këtij eventi promovohet nga distileritë e Perkotos në Udine dhe u shkon personazheve të mëdhenj të kulturës me gjykimin e një jurie të drejtuar nga nobelisti, V.S. Naipaul.
Në vlerësimin e jurisë, Kadare vlerësohet si: “Një rapsod i dashuruar, por edhe kritik me popullin e tij. Mes realitetit historik dhe legjendave që rikujtojnë madhështitë dhe tragjeditë e së shkuarës ballkanike dhe osmane, Kadare krijoi tregime të mëdha”.
Juria në Udine vlerësoi gjithashtu me çmimin “Një mjeshtër i kohës sonë” filozofin italian, Giorgio Agamben, krijuesi i konceptit “Homo Sacer”, qenia njerëzore për të cilin jeta është e shenjtë.
Ceremonia e dhënies së çmimeve do të zhvillohet në distileritë “Nonino Di Ronchi” në Perkoto, Udine, më 27 janar.
