Ditën e sotme është ndarë nga jeta në moshën 75-vjeçare futbollisti gjerman, Gerd Muller. Prej 6 vitesh ai vuante nga sëmundja e pakurueshme e Alzheimer (forma më e zakonshme e dementias). Lajmi i trishtë u konfirmua edhe nga Bayern Munchen përmes një postimi në rrjete sociale.
“Bayern Munchen dhe të gjithë tifozët tanë mbajnë zi për Gerd Muller, i cili humbi jetën sot në mëngjes në moshën 75-vjeçare. Muller bëri historinë me Bayern dhe skuadrën kombëtare të Gjermanisë“, lexohet në komunikatën zyrtare të rekordmenëve të futbollit gjerman.
View this post on Instagram
Gerd Muller e mbajti veshur fanellën e Bayern Munchen për 15 sezone radhazi (1964-1979), periudhë gjatë së cilës shënoi 398 gola në 453 ndeshje. Ish-sulmuesi unik fitoi 14 trofe me skuadrën bavareze.
Vetëm Leo Messi, në vitin 2012, ishte në gjendje të mposhte rekordin e tij për golat e shënuar në një vit (85). Sulmuesi i atij Bayerni legjendar të viteve ‘70 fitoi edhe një Top të Artë (1970) dhe dy “Këpuca të Arta” (1970 dhe 1972). Ai u tërhoq nga futbolli në vitin 1981.
Muller realizoi plot 365 gola në 427 ndeshje të luajtura në Bundesliga, teksa në kompeticionet evropiane shënoi 66 gola në 74 përballje. Rekord edhe me “Pancerat”, me të cilët në 62 ndeshje e gjeti plot 68 herë rrugën e rrjetës.
