Ndërkohë që ne të gjithë si qytetarë kemi një sërë dilemash si “Kur nis plazhi?”, “Si do të qëndrojmë në çadra?” “Sa do të shpenzojmë” apo “Ku do të pushojmë?”, gjithçka që duhet të synojmë këtë vit është: “Pushime në Shqipëri!
Pas goditjes nga tërmeti i 26 nëntorit dhe krizës nga pandemia, e vetmja gjë që kemi në dorë ne si qytetarë për t’i ardhur në ndihmë sektorit të turizmit, është patriotizmi ekonomik. Shpenzimi i buxhetit të planifikuar për pushimet brenda Shqipërisë, është njëra rrugë sesi mund të shpëtojmë turizmin dhe ata punononjës/e që janë pjesë e këtij sektori, thotë kreu i Shoqatës së Turoperatorëve dhe Agjencive Turistike, z. Rexhep Kasmi për iconstyle.al.
“Thirrja ime për të gjithë banorët e këtij vendi është: Shpenzoni buxhetin tuaj të pushimeve në Shqipëri sepse kështu mund të mbajmë në punë mijëra vëllezër dhe motra në të gjithë vendin. Ky patriotizëm ekonomik është sot i domosdoshëm për të shmangur krizën ku ndodhet vendi si e gjithë bota. Edhe shtete të fuqishme si Gjermania po bëjnë të njëjtën thirrje në forma të ndryshme që Gjermanët të bëjnëë pushimet sivjet në vendin e tyre”.
Në një letër dërguar qeverisë dhe ministrive, asaj të Ekonomisë dhe të Turizmit, shoqata e turoperatorëve ka propozuar një lloj bonusi për pushuesit vendas, në formën e rimbursimit të taksave në faturat e ujit dhe dritave.
“Ideja e bonusit erdhi në kushtet ku ndodhemi. Po të kemi parasysh që të gjithë të huajt që bëjnë pushime apo vizitojnë Shqipërinë vijnë nëpërmjet Tour Operatoreve Shqiptarë dhe agjensive turistike atëherë kjo duhet të funksionojë edhe për pushuesit shqiptarë sepse në këtë formë garantohet cilësia e shërbimit, niveli i çmimeve si dhe mbrojtja e interesave të pushuesve, do ishte një lëvizje e domosdoshme stimulimi me bonuse i pushuesve shqiptare që të prenotonin pushimet nëpërmjet Operatorëve Shqiptarë ashtu siç bëjnë kur shkojnë me pushime jashtë Shqipërisë”, shprehet z. Kasmi.
Kërkesat përfshijnë edhe stimuj për shqiptarët që vijnë nga Kosova apo Maqedonia, përmes kompesimit të taksës së Rrugës së Kombit.
Z. Kasmi foli për iconstyle.al për kompensim të taksës së rrugës për ata që vijnë për pushime në Shqipëri dhe qëndrojnë minimumi tre ditë në Shqipëri: “Mendoj se do ishte një stimul i domosdoshëm për nxitjen e ardhjes së pushuesve.
E ndërkohë që propozimet dhe kërkesat për t’i ardhur në ndihmë sektorit të turizmit nuk mungojnë, qeveria duket se po vijon të heshtë dhe masat e marra duken si tallje (lexo këtu).
Në letrën publike dërguar prej 14 majit, Shoqata e Turoperatorëve kërkon hapjen sa më shpejt të kufijve dhe lejimin i lëvizjes së lirë, sigurisht duke synuar marrëveshje dy apo shumë palëshe me ato shtete që mund të arrihen ose të paktën sa më shpejt me vendet e rajonit.
“Hapja e kufijve qoftë edhe paralel me hapjen e plazheve për pushuesit jo më larg se 1 Qershori. Kjo do të bënte një jehonë dhe një reklamë të mirë që ndoshta do të mundësonte edhe ardhjen e pushuesve perëndimorë në muajt Korrik – Gusht e më gjatë”, shprehet z. Kasmi, i cili thekson se 1 qershori duhet të jetë data kur Shqipëria të konsiderohet e hapur me vendet e tjera të rajonit.
“Unë mendoj se duhet të bëhet përpjekje e pa rreshtur që maksimumi më 1 Qershor Shqipëria të konsiderohet e hapur në të gjitha sektorët. E hapur për lëvizje të lirë me të gjitha vendet e rajonit”.
Në aspektin financiar, kërkohet që të përfshihen në planet e mbështetjes financiare me paga edhe punonjësit e Turoperatorve Incoming & Outgoing pjesë e biznesit të madh dhe të rishikohet vazhdimi i mbështetjes nga shteti me paga të punonjësve që janë hequr nga puna ose jo, por që për arsye të situatës nuk do punojnë dot për një kohë të gjatë.
“Pagat për punonjësit duhet të jepen për një periudhë deri në fillimin e pakufizuar të fluturimeve dhe hapjen e plotë të kufijve ajrorë/tokesorë/detar pa shtrëngime karantine brenda apo jashtë vendit”
Në kuadrin ligjor, shoqata kërkon ribërjen e plotë e Ligjit të Turizmit, tashmë parë edhe nën situatën e standarteve të sigurisë nga Covid-19.
“Rikthimi i domosdoshëm i nenit për Fondin e Turizmit. Në të përcaktohen burimet e këtij fondi (një pjesë e tij duhet të vijë nga taksa e qytetit/turistit që i merret hoteleve nga bashkitë, taksat që paguajnë e gjithë pjesa tjetër e sektorit të turizmit si turoperatorë, agjenci turistike, guida, restorante, transport turistik, etj) si dhe të përcaktohen qartë format e perdorimit të këtij Fondi, ku me e para do ishte mbulimi dhe mbështetja e sektorit në kriza të tilla”.
/Iconstyle.al
