Në muajin tetor të vitit 2017, një gazetare investigative nga Malta e quajtur Daphne Caruana Galizia, humbi jetën pas shpërthimit të makinës me të cilën po udhëtonte.
Pas hetimeve për vrasjen e saj, një pistë dyshimi u ngrit për faktin që bomba nga e cila 53-vjeçarja ndërroi jetë, kishte ardhur nga Shqipëria.
Në një intervistë të dhënë së fundmi për “The Shift”, Matthew, i biri i gazetares së vrarë është shprehur se qeveria shqiptare nuk ka bërë asnjë hetim për këtë ngjarje të rëndë
“Bomba që u përdor për të vrarë nënën time erdhi nga Shqipëria, nëpërmjet Italisë. Furnizohej nga krimi i organizuar shqiptar. Qeveria e Shqipërisë nuk ka bërë asnjë hetim se si një bombë u furnizua nga njerëzit në Shqipëri dhe më pas u përdor për të vrarë një gazetare në Maltë. Nuk kanë bërë asgjë. Ata nuk kanë bërë absolutisht asgjë. Nuk ka mundësi që kryeministri Edi Rama të mos e dijë se ekziston ky problem. Nëse ai nuk e di që furnizimi me bomba nga Shqipëria është problem, atëherë duhet të pushojë absolutisht të gjithë në shërbimet e tij inteligjente. Nuk ka asnjë mënyrë që ai të mos dijë për këtë.”- u shpreh ai.
Pajisja shpërthyese dyshohet se iu dha vrasësve të akuzuar, Robert Agius dhe Jamie Vella, të cilët janë dënuar në Maltë. Besohet se Agius udhëtoi në Shqipëri të paktën tre herë para atentatit.
Pavarësisht pyetjeve të “The Shift” të dërguara me email dhe drejtpërdrejt tek zv.ministri i Brendshëm në disa raste, nuk u mor asnjë përgjigje.
“Nuk ka asnjë deklaratë nga qeveria. asgjë. Absolutisht asgjë”, tha Matthew Caruana Galizia.
