Autoriteti Rrugor Shqiptar dhe Policia e Qarkullimit Rrugor kanë njoftuar se një tjetër aks i autostradës do të devijohet, për shkak të punimeve që po kryhen në kuadër të nisjes së projektit të mirëmbajtjes.
Punimet kanë nisur sot në orën 06:00 të mëngjesit në segmentin Ura e Dajlanit – Mbikalimi Sukth në drejtimin Durrës – Tiranë.
“ARRSH dhe Policia e Qarkullimit Rrugor kërkojnë mirëkuptimin dhe bashkëpunimin e drejtuesve të mjeteve gjatë procesit të ndërhyrjes në këtë aks rrugor dhe respektimin në mënyrë rigoroze sinjalistikën provizore te vendosur dhe udhëzimet e policisë rrugore në terren”, thuhet në njoftim sipas “Panorama.al”.
Automjetet që udhëtojnë nga Durrësi në drejtim të Tiranës duhet të devijohen te Ura Dajlanit dhe të vazhdojnë në rrugën dytësore deri në kryqëzimin e Sukthit dhe në vazhdim mund të dalin përsëri në autostradë ose të vazhdojnë në rrugën dytësore.
Ky devijim do te përfundojë deri ditën e martë, më datë 26/06/2018 ora 24:00.
Ndërkohë, ARRSH njofton gjithashtu se punimet e fazës së katërt në segmentin Ura e Shkozetit – Ura e Dajlanit drejtimi Tiranë – Durrës kanë përfunduar dhe segmenti rrugor është i hapur për trafikun përpara afatit të parashikuar.
