Një tjetër dëshmi është bërë sot publike për vajzën shqiptare, Bleona Mata, e cila humbi pa lënë gjurmë në 22 maj të vitit 2010.
Dëshmitari i cili njihet me emrin Meti Xheladini, ka thënë për emisionin “Pa Gjurmë” se Bleona ndodhet në Maqedoni, por kërkon 300 euro për të ardhur në Tiranë.
Stafi i emisionit i vendosi në dispozicion taksinë, por ai hezitoi duke lënë të kuptohet se po mashtronte.
Nëna e Bleona Matës paralajmëroi denoncim në polici për mashtrim për shqiptarin nga Maqedonia.
“Ai gjithmonë rri në kontakt, thotë e di ku është Bleona. Po nuk i sollët kaq lekë…Unë i kam thënë para se të sillte fotot, pastaj fiku telefonin. Ai duhet verifikuar nga shteti, e ka mendjen vetëm te paraja, ai kërkon 300 euro për taksi. Unë do i kisha thënë 3 mijë nëse do e kishte sjellë vajzën. Nëse ka nënë dhe fëmijë Zoti ia lëshoftë mbi kokë këtë që po më bën mua, ky kanibal. Njëherë tha dua 25 mijë euro, njëherë tha 12 mijë euro”.
Nëna e Bleonës ka folur më herët për dyshimet e saj, se vajza mund të jetë në Maqedoninë e Veriut dhe sipas dëshmisë së Xheladinit, vajza besohet të ketë qenë në Greqi, Maqedoni, Angli dhe Turqi:
“ Unë jam Meti nga Kërcova. Unë kam dërguar fotot e Bleonës në Angli. Belona tani është në Maqedoni, unë nuk i kam mundësitë me e marrë dhe me e sjellë çikën, e kam larg 280 km larg. Bleona rri në Strumicë momentalisht. Bleonën e mbajnë dy persona, njëri shqiptar dhe tjetri maqedonas, ky i ka ndihmuar nga Greqia të vijnë në Maqedoni. Kur e kanë marrë nga Shqipëria, Belona ka qenë në Greqi, në Maqedoni, shkoi në Angli, pastaj në Maqedoni prapë, Turqi, Angli dhe më pas sërish në Maqedoni. Fotot e vajzës m’i ka dërguar një njeri”.
