Prej disa ditësh në media qarkulloi lajmi se gazetari i emisionit “Opinion”, Blendi Fevziu do të transferohej nga “Tv Klan” në “Top Channel”, pasi kishte marrë një ofertë joshëse nga Ben Blushi. Mirëpo u mësua se Blendi e kishte refuzuar ofertën e Blushit dhe kishte vendosur të qëndronte përfundimisht në “Tv Klan”.
Sot i ftuar në emisionin “360 gradë”, Blendi rrëfue arsyen e vërtetë që e shtyu drejt këtij vendimi.
“Kam qenë midis një tundimi për një projekt shumë interesant që në Top ka nisur ta zbatojë Ben Blushi, miku im i vjetër dhe tërheqjes emocionale ndaj këtij televizioni ku kam qenë 20 vjet, pa pasur kurrë shqetësime nga ato që shumë prej kolegëve kanë në ekrane të ndryshme. Unë kam thënë që kjo nuk është një zgjidhje racionale, zgjidhjet racionale priten kollaj. Ka qenë një zgjidhje emocionale. Zgjidhjet emocionale janë të vështira dhe zgjidhja ka qenë po emocionale në këtë rast. Kam vendosur të vazhdoj në një vend ku ti prap gjithsesi me të gjithë problematikën je i mësuar, ke krijuar një lloj stabiliteti”, ka rrëfyer Blendi në emisionin “360 gradë”.
