Gjatë kësaj jave, u njoftua se emisioni “Opinion” mund të braktisë televizionin “Klan”. Lajm ky që nuk u mohua nga Blendi Fevziu dhe stafi i tij, të cilët theksuan se kanë marë një ofertë nga “Top Channel”, por ende nuk kanë vendosur. Autori dhe moderatori i “Opinion” Blendi Fevziu ka treguar për herë të parë për “Panorama Plus” për detajet e ofertës së propozuar nga Ben Blushi.
“Disa kohë më parë, në një bisedë me Ben Blushin, drejtorin e ri të Top Channel, kemi folur për disa pakënaqësi të miat në Tv Klan. Kanë qenë probleme që lidheshin me mënyrën konceptuale dhe funksionale të televizionit, për të cilat ka debate në çdo media. Ben Blushi më bëri një propozim për t’u bërë pjesë e Top Channel. Duke parë mënyrën se si ai Televizion po fuqizon linjën politike dhe gazetareske pas ardhjes së Blushit, u ndjeva i tunduar nga ky propozim. Deri tani nuk kam marrë asnjë vendim nëse do transferohem në Top, apo do të qëndroj në Klan”- tha ai.
Blendi Fevziu theksoi se do të marrë shumë shpejt një vendim, duke u bazuar tek ndjesitë dhe faktet që kanë më shumë rëndësi për të dhe stafin e tij.
