Zërat se emisioni “Opinion” do të braktisë televizionin “Klan” pas 20 vitesh bashkëpunim, për t’u zhvendosur në “Top Channel”, duket se po konfirmohen dita-ditës. Fillimisht ishte moderatori Blendi Fevziu, që pranoi se ekziston një ofertë e tillë nga televizioni “Top Channel” mirëpo ende nuk ka marrë një vendim.
Sakaq, kryeredaktorja e “Opinion” Desada Meta, përmes një statusi në profilin e saj në “Facebook”, shprehet se nuk ka rëndësi se ku do të transmetohet emisioni, përsa kohë që produkti që do të sjellin përpara publikut, do të jetë i njëjtë.
“Mes shumë halleve që ka ky vend, na del problem dhe ekrani ku do të transmetohet emisioni ‘Opinion’. Personalisht, si pjesë 10-vjeçare e stafit, jam e bindur që nuk ka pasur kurrë rëndësi logo e televizionit që transmeton emisionin, krahasuar kjo me produktin që shikuesit kanë ndjekur dhe do të vazhdojnë të shohin në vazhdim. Të gjithë kuriozët duhet të presin dhe pak për vendimin. Ndërkohë që për shikuesit e rregullt te emisionit, jam e bindur se logo ku transmetohet emisioni i tyre i dashur nuk ka kurrfarë rëndësie.” – shkruan Desada, duke konfirmuar se ende po shqyrtohet oferta për t’u bërë pjesë e televizionit “Top Channel”.
