Prej më shumë se 2 muajsh, bizneset që janë pjesë e qendrave tregtare po përballen me periudhën më të keqe financiare.
Për shkak të izolimit të detyruar për të shmangur infektimin me koronavirus, qendrat tregtare u detyruan të mbylleshin me urdhër të qeverisë, duke bërë që bizneset që janë pjesë e tyre të pësojnë një rënie drastike, që pritet të vijojë edhe më tej.
Por sikur të mos mjaftonin politikat e gabuara të insitucioneve fiskale në përballimin e kësaj situate (lexo këtu), sipërmarrësit e këtyre bizneseve janë vënë me shpatulla pas muri dhe nga drejtuesit e qendrave tregtare.
Në komunikim me shumë prej tyre, “iconstyle.al” ka mësuar se bizneseve në qendrat tregtare u është kërkuar të kryejnë pagesat e qirave dhe shërbimeve të përbashkëta, pavarësisht se aktiviteti i tyre ka qenë i bllokuar, çka ka rezultuar në humbje të jashtëzakonshme (lexo këtu).
Një gjë e tillë ka shkaktuar irritim mes sipërmarrësve të cilët janë ndier të fyer e të tradhtuar, teksa rrëfimet e tyre nxjerrin në dritë dhe një tjetër problem të madh: Atë të diferencimit dhe diskriminimit të bizneseve në mënyrën sesi është vepruar.
Me dikë është negociuar për të bërë një ulje të vogël, me dikë aspak. Ndërkohë burime për “iconstyle.al” bëjnë të ditur se klientëve preferencialë u janë bërë propozime të volitshme duke u mundësuar atyre lehtësira të shumta gjatë kësaj periudhe. “iconstyle.al” kontaktoi me përfaqësuesit e këtyre bizneseve, të cilët refuzuan të jepnin detaje mbi situatën, duke u shprehur: “Drejtuesit e qendrave tregtare mund të negociojnë në mënyra të ndryshme me biznese të ndryshme.”
Mirëpo teksa drejtuesit e qendrave tregtare e shohin të arsyeshme të bëjnë diferencime të tilla në kurrizin e bizneseve që mund të mos kenë lidhjet e duhura apo të ardhurat e majme për të siguruar një trajtim të ndryshëm, kontratat që ata kanë firmosur dhe ligji në Shqipëri i detyron të zbatojnë marrëveshjet e kryera.
Strategjia më e përhapur është ajo e ofrimit të një uljeje prej 20% të vlerës së qirasë nëse pagesa kryhet deri në muajin gusht, por edhe një gjë e tillë i ka lënë thellësisht të pakënaqur sipërmarrësit, të cilët shprehen se kjo është përtej mundësive të tyre.
“Është e pamundur dhe e palogjikshme! Një ulje prej 20% është qesharake kur ne nuk po mundemi të paguajmë punonjësit. Nëse qendrat tregtare janë kaq në vështirësi me pagesat e veta sa nuk mund të na ofrojnë neve më shumë lehtësi, atëherë le të ndërhyjë shteti që vendosi që të mbyllen. Në Kosovë ka ndodhur, janë subvencionuar 50% e vlerave të qirave në qendrat tregtare, nuk ka përse të mos bëhet dhe në Shqipëri. Nëse ne falimentojmë në këtë moment, kush do t’i zërë ato hapsira në qendrat tregtare në këtë kohë krize?”-shprehet një sipërmarrës për “iconstyle.al”.
