Bill Gates nuk ka marrëdhënie aspak të mira me kriptomonedhën.
Themeluesi miliarderi i Microsoft-it nuk ka nguruar të shprehë qëndrimin e tij mbi teknologjinë blockchain në të kaluarën, duke debatuar me rivalin e tij Elon Musk për qëndrueshmërinë e monedhave. Gates i ka akuzuar operacionet e minierave të Bitcoin për ndikimin e tyre shkatërrues mjedisor. Tani, në vazhdën e përplasjes ekstreme të kriptos, Gates ka ironizuar edhe një herë monedhat dixhitale dhe NFT-të.
Duke folur të martën në një konferencë për klimën “TechCrunch”, miliarderi tha se monedhat virtuale janë “100 për qind të bazuara në Teorinë e Budallait të Madh”.
Kjo është një ide ekonomike që, me pak fjalë, i referohet blerjes dhe shitjes së aktiveve të mbingarkuara me pak ose aspak vlerë të brendshme, nën supozimin se gjithmonë do të ketë një “budalla më të madh” për ta blerë për më shumë para se shifra fillestare.
“Natyrisht, imazhet e shtrenjta dixhitale të majmunëve do ta përmirësojnë botën jashtëzakonisht,” tha ai në mënyrë satirike, duke iu referuar koleksionit popullor të NFT-ve “Bored Ape Yacht Club” (BAYC).
Në vend të kësaj, Gates tha se ai preferon investimet e modës së vjetër.
“Unë jam mësuar me investimet e duhura, si një fermë ku ka prodhim, ose si një kompani ku prodhojnë produkte,” tha ai.
Komentet e tij vijnë teksa bitcoin dhe kriptovalutat e tjera po rrëzohen.
Bitcoin arriti nivelin më të lartë të të gjitha kohërave prej 69,000 dollarë në nëntor 2021. Që atëherë, kriptomonedha më e vlefshme në botë ka humbur dy të tretat e vlerës së saj, duke rënë nën 23,000 dollarë të martën. Ajo ka humbur rreth 25% të vlerës së saj që nga e premtja.
