Në Maqedoninë e Veriut ulen çmimet e karburantit me afro 2 për qind, në Shqipëri nuk ka asnjë ndjeshmëri, jo vetëm ndaj bursës, por as ndaj pandemisë. Biznesi dhe qytetarët ankohen për çmimet dhe cilësinë e karburantit tonë, por Autoriteti i Konkurrencës nuk ndërhyn për të frenuar oligopolin e naftës.
Maqedonia
Në Maqedoninë e Veriut çmimet e benzinës dhe dizelit u ulën të enjten në mesnatë duke reflektuar menjëherë zbritjen e çmimi të të naftës në bursën ndërkombëtare.
Kështu, benzina është ulur për 0,5 denarë, ndërsa dizeli për 1,5 denarë. Një denar me kursin e sotëm është i barabartë me 2.01 Lekë. Komisioni Rregullator për Energjetikë dhe shërbime të ujit të Republikës së Maqedonisë së Veriut, në vendimin me të cilin bëhet ulja e çmimeve të shitjes me pakicë të derivateve të naftës mesatarisht për 1,73 për qind, kumtoi se Eurosuper BS-95 do të kushtojë 59.50 denarë për litër, ndërsa çmimi i shitjes me pakicë të BS-98 do të kushtojë 61,50 denarë.
Çmimi i shitjes me pakicë të Eurodizel (D-E V) do të jetë 50.50 denarë për litër. Çmimi i shitjes me pakicë i mazutit M-1 HC do të kushtojë 25.956 denarë për kilogram.
Bursa
Gjatë javës së kaluar të gjitha çmimet referente në bursat botërore mesatarisht shënojnë ulje: tek benzina për 3.103 për qind, të dizelit për 5.626 për qind, të vajit ekstra të lirë për 5.358 për qind dhe të mazutit për 2.497 për qind.
Çmimet e naftës së papërpunuar shënuan rënie, si pasojë e shpërthimit global të koronavirusit të ri (COVID-19).
Standardi ndërkombëtar i naftës së papërpunuar Brent u tregtua me 39.67 dollarë për fuçi me një rënie prej 0.27 për qind pasi u mbyll të martën me 39.78 dollarë për fuçi.
Biznesi shqiptar ankohet për çmimet e karburantit
Konfindustria vlerëson, se vazhdimësia e çmimeve mjaft të larta absolute dhe krahasimore në nivel rajonal, europian dhe botëror të karburanteve, përbëjnë një nga shkaqet kryesore të fuqisë së ulët konkurruese të ekonomisë shqiptare. Konfindustria thekson, se përmirësimi rrënjësor i funksionimit të tregut të karburanteve, do të jetë ndër kërkesat kryesore të saj ndaj partive politike në zgjedhjet e afërme të vitit 2021.
Sipas analizës krahasimore të kryer nga Qendra e Studimeve të Konfindustrisë, çmimet e karburanteve në Shqipëri për 9 mujorin e vitit 2020 radhiten ndër më të lartat në Europë, duke tejkaluar ndjeshëm edhe vende të pasura si Gjermania, Austria, Zvicra, etj. Gjithashtu, në nivel rajoni çmimet e karburanteve në tregun shqiptar janë afër 50% më të shtrenjta sesa shtete fqinje si Maqedonia, Kosova, etj.
Shqetësues është fakti, që ndërkohë që në tregjet europiane të shitjeve me pakicë të karburanteve në 9 mujorin e parë të 2020, rënia e çmimeve botërore të karburanteve u pasqyrua në nivelet e 45-80% në tregun shqiptar ishte vetëm në 13-18%. Standarde tepër të ulta të cilësisë së karburanteve në qarkullim në Shqipëri, thellojnë edhe shumë më tepër problematikat e mësipërme, ankohet Konfindustria.
