Në ambientet e brendshme të kryeministrisë është çelur ditën e sotme ekspzoita “Verba Volant Scripta Manent” me disa thesare të rralla nga Biblioteka Kombëtare e Shqipërisë. Në bashkëpunim me Qendrën për Hapje dhe Dialog, Biblioteka Kombëtare sjell për herë të parë për publikun shqiptar disa libra që nuk janë parë kurrë më herët.
Korpusi libror përbëhet nga antikuarë, dorëshkrime, vepra të albanologëve të spikatur e shumë të tjera. Veprat e paraqitura në ekspozitë janë kryesisht nga autorë të huaj, por edhe nga ata shqiptarë e arbëresh, që janë me vlera të rralla historike e juridike.
I pranishëm në çeljen e ekspozitës ishte edhe kryeministri, Edi Rama, i cili premtoi se shumë shpejt Biblioteka Kombëtare do të ketë një shtëpi të re. Pavarësisht se pritej që ndërtesa e re të ishte gati në këtë 100-vjetor, projekti nuk u realizua.
Gjatë fjalimit të tij Rama u shpreh se tërmeti i 26 nëntorit dhe më pas kriza financiare nga Covid-19 pengoi këtë projekt.
“Zgjedhja e bërë me këtë ekspozitë është një dëshmi e rrallë, faktike, e prekshme e një historie të gjatë që kalon shumë shekuj dhe mishërohet në libra, në tekste, objekte që janë ruajtur në thellësitë e organizmit të Bibliotekës Kombëtare.
Shpresoj shumë që miqtë e apasionuar të librit të mund ta vizitojnë, përjetojnë këtë emocion të veçantë. Do të kishte qenë vërtet shumë më bukur të kishim mundësi që këtë 100-vjetor ta kremtonim në godinën e re të Bibliotekës Kombëtare, por fatkeqësisht projekti i nisur me shumë dëshirë dhe i futur në procesin e formësimit të tij, mbase gaboj por edhe pse me maskë, duhet të jetë Persida ajo që shoh në krahun tim të djathtë, kemi punuar sistematikisht për ta futur në rrugë projektin që u desh të ndalej nga tërmeti, edhe sot pasi rrënojat e tërmetit duhen kthyer në shtëpi e apartamente. Pastaj i’u mbivendos edhe goditja e rëndë financiare e të gjithëve për shkak të covid. Megjithatë projekti e ka nisur rrugën e tij, kam besim se do të shkojë deri në fund, nuk e them dot se kur, por jo aq gjatë sa ka shkuar deri më sot”, u shpreh Rama.
Ekspozita e organizuar nga Biblioteka Kombëtare do të qëndrojë e hapur deri në 31 tetor.
