Sly Stone, yll i funk-rock-ut i cili udhëhoqi grupin Sly and the Family Stone, ka vdekur në moshën 82 vjeç, tha familja e tij.
Në një deklaratë, ata thanë se ai vdiq pas një “beteje të zgjatur” me COPD, një sëmundje të mushkërive që e vështirëson frymëmarrjen, dhe probleme të tjera shëndetësore.
“Sly ishte një figurë monumentale, një novator inovativ dhe një pionier i vërtetë që ripërcaktoi peizazhin e muzikës pop, funk dhe rock”, tha familja e tij. “Këngët e tij ikonike kanë lënë një gjurmë të pashlyeshme në botë dhe ndikimi i tij mbetet i pamohueshëm.”
Ai u bë i famshëm në vitet 1960 dhe 1970, pasi filloi si DJ në San Francisko.
Stone, emri i vërtetë i të cilit ishte Sylvester Stewart, filloi të këndonte muzikë gospel me vëllezërit dhe motrat e tij në një moshë të re. Ai e filloi karrierën e tij si DJ për stacionet radiofonike në Kaliforni dhe më pas formoi një grup muzikor që përfshinte edhe vëllain e tij, të quajtur Sly and the Family Stone.
Fillimisht, ky grup luante muzikë gospel, por me kalimin e kohës u bënë të njohur për përzierjen e stileve muzikore duke përfshirë psikedelinë dhe funkun.
