Besojeni ose jo, por Era Istrefi mesa duket do të këndojë këngën e Kampionatit Botëror të Futbollit

Këngëtarja shqiptare Era Istrefi, pas suksesit ndërkombëtar me këngën “Bon Bon”, duket se së shpejti do të shënoj edhe një sukses tjetër të rëndësishëm në karrierën e saj artistike.

Sipas “Prive” Era Istrefi do të jetë pjesë e këngës që do të dëgjohet për një muaj të tërë në të gjithë botën. 23-vjeçarja shqiptare do të jetë zëri i Kampionatit Botëror të Futbollit dhe do të bashkëpunojë me një artist të madh si Will Smith, i cili është i njohur në të gjithë botën.

“Era Istrefi do të bëjë këngën e Kampionatit Botëror të Futbollit. Aktori e këngëtari i famshëm Will Smith do të këndojë me Erën në këtë projekt në të cilin producent është i famshmi DJ Deeplo, dhe xhirimet e spotit fillojnë nesër”, kanë thënë burime të afërta të këngëtares për “Prive”.

Kampionati Botëror i Futbollit, i cili mbahet çdo katër vjet, këtë vit do të organizohet në Rusi nga data 14 qershor deri në 15 korrik. Me sa duket këtë vit do të kemi një arsye më shumë për ta ndjekur Kampionatin Botëror të Futbollit.