Kanë kaluar më shumë se 10 vjet që kur ai u shfaq për herë të parë në “Portokalli” dhe që prej atëherë, Bes Kallaku mbetet një ndër aktorët më të pëlqyer dhe më të ndjekur të humorit në Shqipëri.
Aftësia e tij për të depërtuar në rolet që sjell, aq sa identifikohet me emrat e tyre si, “Gjini” apo “Skifteri”, e bën humorin e tij kaq origjinal, sa që të bën të besosh se e ka kaluar vërtet atë që thotë përmes rolit që luan. Po ku i dihet edhe mundet ta ketë kaluar, fundja, i tillë duhet të jetë një aktor i mirë, të të surprizojë. Këtë premton edhe Bes Kallaku në një intervistë për “Iconstyle”, ku thotë se do të ketë shumë të reja në sezonin e ri të “Portokallisë”, bashkë me kolegun e tij Erionin.
Por një aktor duhet t’i bëjë të gjitha, edhe të këndojë. Besart Kallaku e pranon se nuk ka lidhje me muzikën, por ku ka lidhje më të madhe se të ndash jetën me një këngëtare. Ai bashkëjeton prej kohësh me Xhensila Myrtezajn dhe i dedikon asaj suksesin që ka arritur jo vetëm në muzikë, por edhe në jetë.
Edhe pse nuk e shuan kuriozitetin tonë për të ditur më shumë rreth planeve të ardhshme me Xhensilën, Besi flet për romancën në çift, kush ia kalon kujt me gjestet romantike. Për më tepër ju ftojmë të lexoni intervistën ekskluzive të Bes Kallakut për “Iconstyle”.
Intervista:
– Sezoni i ri i Portokallisë nis këtë javë. Do ta shohim Besin në ndonjë rol/personazh të ri?
Si çdo fillim sezoni ne duam të sjellim personazhe të reja, të sjellim risi dhe koherencë. Këtë sezon ju premtoj që do të kemi shumë të reja dhe Besi do vijë së bashku me Erjonin me një dyshe të re. Shpresoj të jetë e pëlqyer.
-Çfarë bën Besi para nisjes së sezonit ose spektaklit? Ndonjë veprim për fat apo që “të eci mbarë”?
Para çdo sezoni bëj një udhëtim te Kisha Shna Ndout në Laç, na ec mbarë ne Skifterave, (qesh).
-Fotot me Gabriel Garko-n na ngacmuan disi. Keni ndonjë projekt të ri përpos Portokallisë?
Është akoma herët për të folur. Shpresojmë që gjërat të shkojnë si duhet.
-Kujt i merr mendim të parit për këngët e tua?
Zakonisht mendimi si fillim më vjen mua si budallik. Pastaj e diskutoj patjetër me Xhensilën.
-Si erdhi ideja e këngës “Si mjalti”? Videoklipi duket “dora e Besit”, ishte ideja jote?
Çdo videoklip i këngëve të mia është ide e imja, ose dorë e imja. Në fakt unë në fillim mendoj videoklipin e rradhës pastaj e përshtas si këngë (qesh). Krejt e kundërta nga çfarë duhet të ndodhë normalisht. Për shembull tani kam në mendje një skenë dasme që dua ta bëj këngë.
-Çfarë përgjigje ke për ata që thonë: “Besi s’ka lidhje me muzikën…”
Kanë shumë të drejtë. Unë vërtet s’kam lidhje me muzikën, pavarësisht se më pëlqen shumë të merrem me të. Unë e kam thënë gjithmonë, nuk jam këngëtar, unë jam katunar.
-Sa ka ndikuar Xhensila te shijet e tua për muzikën?
Nëse e keni vënë re, unë kam filluar të jem më i saktë në gjërat që bëj, jo vetëm në këngë por në shumë gjëra në jetë, kjo edhe falë Xhensilës.
-Kë këngëtar shqiptar ia vlen ta dëgjosh live?
Ratin (qesh).
– Kush është më romantik, Besi apo Xhensila?
Në vende të ndryshme dhe në momente të ndryshme varet, nëse jemi në katund jam unë më romantik, nëse jemi në një perëndim dielli, është Xhensila.
-Nëse Xhensila do të vendoste për një operacion plastik, cila do të ishte përgjigja jote e parë?
Jetojmë në një kohë ku edhe meshkujt ca s’po bojn. Kështu që për femrat është diçka e pranueshme.
– Si e mendon dasmën tënde? Ndonjë detaj që do të doje ta bëje ndryshe nga dasmat shqiptare?
Akoma herët.
Burimi: Iconstyle
