Pasi skadoi afati i ultimatumit të tyre, banorët e Bërxullës janë rikthyer në protestë pranë ambienteve të Kadastrës, ku kërkojnë takim me kryetaren e këtij institucioni Dallëndyshe Bici.
Banorët kundërshtojnë projektin e rrugës Thumanë Kashar, që pritet të shembë 22 banesa në zonë, dhe të dëmtojë dhjetëra hektarë tokë.
Përveç punonjësve të policisë, banorët janë përplasur dhe shtyrë fizikisht dhe me rojet private të godinës.
“Ne jemi në qiell të hapur, nga minuta në minutë mund të dalim m çadra. Punimet vazhdojmë, por projekt nuk ka. Duhet të bëhemi Dallëndyshe si zonja Bici se nuk kemi ku të kalojmë. Duhet të fluturojmë që të kalojmë në anën tjetër. Nuk na japin përgjigje as Kryeministria, as Ministria dhe kemi ngelur në qiell të hapur. Kërkojmë vetëm të zbatohet ligji dhe asnjë më tepër”, tha një protestues.
“Ore me muret do flasim ne, mos merrni në mbrojtje vampirët e shtetit shqiptar! Çfarë godine private është kjo mo? Nuk kemi ardhur këtu që të dëmtojmë asgjë, ne duam zgjidhje për pronat tona”, shprehen banorët.
“Këtu pa dhënë ryshfetin nuk mbaron punë. U bëj thirrje të mos vonohen, por të vijnë të flasin me ne dhe të mbarojmë punë. T’u japin shpjegim banorëve në terren sepse ndryshe nuk do të kenë shpëtim”, ka thënë një prej banorëve.
Gjithashtu ai ka theksuar se paligjshmëritë nuk kanë fund, ndërsa kanë kërkuar zgjidhje të menjëhershme pasi nuk do të heqin dorë deri sa të vendoset e drejta.
“Forca është fundi i logjikës, por nëse këta nuk pranojnë dialog do të hyjmë me forcë në Hipotekë”, ka thënë ai.
Banorët shprehen se projekti i rrugës është bërë, pa pasur një inventarizim të pronave që do të shemben, një pjesë e të cilave janë në proces legalizimi.
