Prej një kohe të gjatë ai i kishte munguar skenës dhe televizioneve shqiptare. E kemi fjalën për Erion Korinin që të gjithë e mbajnë mend për bashkëpunimin që ka realizuar me këngëtaren Greta Koçi me titull: “Kush ka faj”.
I ftuar dje në emisionin “Soiree” që transmetohet në “Top Channel”, Erioni tha: “Kur e shohin njerëzit tani thonë: U çfarë videoklipi. Po për kohën ka qenë këngë goxha e mirë dhe klip shumë i bukur”.
Klipi është realizuar në Apoloni dhe Erioni mbante një model flokësh bisht pëllumb.
“Ne shqiptarët e kemi zakon t’i gjykojmë për keq videoklipet e së kaluarës. Por po të shohim Çelentanon themi ua sa bukur”.
Bashkëpunimi me Greta Koçin ka qenë fare i rastësishëm. Ata u njohën tek performonin në një klub muzike live.
“Në atë kohë mund të quhesha i famshëm sepse kisha fituar 25 milionë lekë nga shitja e albumeve dhe në atë kohë ishte … shumë”.
Çfarë ka bërë Erioni gjatë gjithë kësaj kohe?
Njerëzit nuk e kanë parë në televizor, por ata që i njohin zërin mund ta kenë dëgjuar Erionin nëpër spote, reklama, dokumentarë dhe aktualisht punon në radio tek “Ora News”, i cili ka ekskluzivitetin e zërit të tij.
Surpriza është se Erion Korini, pas një pauze të gjatë ka vendosur të kthehet në muzikë dhe brenda tri muajsh pritet të nxjerrë këngën e tij.
“Njëriu që dua më shumë në këtë jetë do që të më shikoje sërish në skenë. Ajo është nëna ime. Do të nxjerr këngën e radhës, shpresoj pas tri muajsh. Kësaj radhe dua të bëj këngët që dua unë dhe për ata pak që duan zërin tim”.
Iconstyle.al
