Shqipëria do të përfaqësohet këtë vit në Eurovizion me këngën “Mall” të Eugent Bushpepës.
Për çudinë e të gjithëve, Eugenti nëpërmjet një postimi në Facebook, të cilin më pas e ka fshirë, ka lajmëruar se turneu është anuluar.
“Dëshirojmë t’ju njoftojmë se për shkak të disa problemeve teknike, Eugent Bushpepa nuk do të marr pjesë në turneun e promovimit të këngës në Eurovision 2018 në Tel Aviv, Amsterdam dhe Madrid, edhe pse RTSH ka konfirmuar pjesëmarrjen e tij 2 muaj më parë”,-shkruhej në statusin e Eugentit, të cilin e ka fshirë më pas.
“Eurovoix” ka bërë të ditur se anulimi i turneut nga këngëtari shqiptar ka ardhur pasi ai nuk mori pjesë as në festën organizuar nga Eurovizion në Londër. Mungesa e tij në këtë festë u përfol se ishte për shkak të problemeve të tij me vizën. Ndërkohë ende nuk ka një konfirmim zyrtar nga delegacioni shqiptar se përse po ndodhin këto ngjarje.
Megjithatë, përgatitjet për në Lisbonë vazhdojnë me intensitet për të sjellë një performancë të jashtëzakonshme në skenën e Eurovizionit 2018, më 8 maj.
