Surpriza e ditës së fundit e Javës së Modës në Londër ishte prania e Mbretëreshës Elizabeth II. Shfaqja e saj në rreshtin e parë të një pasarele, ishte krejtësisht e papritur.
Në krah të ikonës së stilit, Ana Wintour, monarkja 91-vjeçare ndoqi sfilatën e stilistit të ri Richard Quinn. Ky i fundit mbylli javën e modës në kryeqytetin anglez, me një koleksion shumëngjyrësh.
Në përfundim të shfaqjes, monarkja i prezantoi dizajnuesit Quinn çmimin “Mbretëresha Elizabeth II”, që është krijuar për të njohur rolin e industrisë britanike të modës në shoqëri dhe diplomaci.
Ai do t’i jepet çdo vit një stilisti të ri britanik, që shfaq talent të jashtëzakonshëm dhe origjinalitet.
Londinezi Quinn themeloi kompaninë e tij në vitin 2016. Në faqen zyrtare të internetit të javës së modës në Londër thuhet se, koleksionet e tij janë të guximshme dhe pararojë. Të hënën, monarkja ftoi dizajnuesit dhe modelet në një pritje të zhvilluar në “Buckingham Palace”.
