Këngëtarja shqiptare Bebe Rexha ishte ndër performueset në eventin e rëndësishëm të muzikës “MTV Europe Music Awards”, që u mbajt në Bizkaia Arena në Bilbao të Spanjës.
Ajo arriti që të mahniste publikun me paraqitjen e saj në skenë, koreografinë dhe zërin e saj.
Bebe u shfaq e veshur me një trupore të kuqe lëkure dhe çizme të gjata të të njëjtës ngjyrë.
Ajo këndoi hitin “I’m a Mess” dhe performanca e saj u vlerësua edhe nga MTV, ndërsa “Billboard” shkroi:
“Ndoshta askush nuk përfitoi më mirë nga eventi sesa Rexha, e cila dha më të mirën gjatë performancës. Ajo doli nga vaska, vrapoi përgjatë një ushtrie kërcimtarësh të veshur me përparëset e infermierëve, kërceu në një platformë të lëvizshme dhe u kthye sërish në vaskë, të gjitha këto në 3 minuta me vokalin fantastik”.
Këngëtarja me origjinë shqiptare ishte nominuar në kategorinë për këngën më të mirë, “Meant To Be”, të cilën e ka në bashkëpunim me Florida Georgia Line.
Ajo nuk arriti të triumfonte, pasi këtë çmim e fitoi Camila Cabello me këngën “Havana”, në bashkëpunim me Young Thug.
Burimi: Billboard
