Gjykata e Bashkimit Europian hodhi poshtë kërkesën e Google, kundër vendimit të Komisionit Europian për të gjobitur me 2.42 miliardë euro shoqërinë, pasi ka abuzuar me pozicionin dominues, duke i dhënë avantazh të paligjshëm shërbimit të tij të krahasimit të blerjeve, Google Shooping.
Gjykata e hodhi poshtë ankesën e gjigantit të motorit të kërkimit dhe shoqërisë mëmë, Alphabet, duke njohur “karakterin antikonkurrues të praktikës së dyshimtë”, nga shërbimi Shopping.
“Google është larguar nga konkurrenca mbi bazën e meritave” nëpërmjet një pozicionimi më favorizues të shërbimit të tij të krahasimit të blerjeve, duke ulur shërbimet konkurrente, të zhvendosura në kolonën e rezultateve gjenerike.
Gjyqtarët e Luksemburgut besojnë se, në fund të hetimit të nisur në vitin 2010, pas ankesave të paraqitura nga rivalët TripAdvisor dhe Twenga, Komisioni Europian “gjeti me saktësi efekte të dëmshme në konkurrencë” të praktikës së zbatuar nga Google në 11 shtete anëtare, duke përfshirë Italinë, Mbretërinë e Bashkuar dhe Norvegjinë.
“Google nuk është ende në gjendje të demonstrojë asnjë rritje të efikasitetit të lidhur me këtë praktikë që do të kompensonte efektet e saj negative te konkurrenca” – shkruajnë gjykatësit e BE.
Ata vërejtën edhe “se algoritmet për klasifikimin e rezultateve gjenerike apo kritereve për pozicionimin dhe shfaqjen e rezultateve të produkteve të specializuara të Google, mund të përfaqësojnë përmirësime të shërbimit pro konkurrencës, megjithatë kjo nuk e justifikon praktikën në fjalë, d.m.th. trajtimin e pabarabartë të rezultateve të shërbimit të blerjeve krahasuese të Google dhe rezultateve të shërbimeve të blerjeve krahasuese të konkurrentëve”. Gjiganti Mountain View tani ka mundësinë të apelojë dënimin në gjykatën më të lartë, Gjykatën e Drejtësisë së BE-së.
“Njoftimet në Shopping ndihmojnë njerëzit të gjejnë produkte të kërkuara në mënyrë të thjeshtë dhe të shpejtë dhe ndihmojnë tregtarët të arrijnë klientët potencialë. Vendimi i sotëm, që do ta analizojmë në detaje, i referohet një sërë faktesh mjaft specifike dhe që në 2017 kemi bërë ndryshime në përputhje me vendimin e Komisionit Europian. Mënyra jonë ka funksionuar me sukses për më shumë se tre vjet, duke gjeneruar miliarda klikime për më shumë se 700 shërbime të blerjeve krahasuese” – komenton një zëdhënës i Google.
Historia e BE kundër Big Tech
Vendimi antitrust vjen në mes të një morie përpjekjesh për të frenuar kompanitë kryesore teknologjike amerikane, si Google, Apple, Facebook, Amazon e Microsoft. Kompanitë, të quajtura së bashku GAFAM, janë akuzuar për shmangie taksash, mbytje konkurrence, vjedhje të përmbajtjes së mediave dhe kërcënim i demokracisë duke përhapur lajme të rreme (fake news).
Në vitin 2013, BE gjobiti Microsoft me 561 milionë euro pasi imponoi motorin e tij të kërkimit Internet Explorer te përdoruesit e Windows 7. Ndërkohë edhe Amazon, Apple e Facebook kanë qenë nën hetim nga BE për shkelje të mundshme të rregullave të konkurrencës dhe gjykatat e BE-së kanë vendosur të rrisin gjobat për kompanitë teknologjike që thyejnë rregullat e konkurrencës.
/ANSA
