Bota e sportit është në zi pas lajmit për ndarjen nga jeta të ish-basketbollistes së njohur të WNBA-së, Kara Braxton, në moshën 43-vjeçare. Ish-kampionia dy herë me skuadrën Detroit Shock ndërroi jetë, ndërsa shkaku i vdekjes nuk është bërë ende i ditur. Lajmi u konfirmua edhe nga vetë WNBA përmes një deklarate zyrtare, ku u shpreh dhimbja për humbjen e një prej figurave të rëndësishme të kampionatit.
“Me dhimbje të thellë njoftojmë ndarjen nga jeta të Kara Braxton, kampione dy herë e WNBA-s. Mendimet tona janë me familjen, miqtë dhe ish-shoqet e saj të ekipit në këtë moment të vështirë,” thuhej në reagimin e ligës.
Humbja e sportistes ka prekur thellë familjen dhe të afërmit e saj. Djali i Braxton, Jelani Thurman, i cili aktualisht luan futboll amerikan për Universitetin e Karolinës së Veriut, i dedikoi nënës së tij një mesazh emocional në rrjetet sociale.
Ai publikoi një kolazh fotosh nga periudha të ndryshme të jetës së tyre nga fëmijëria e tij deri në karrierën universitare duke shkruar: “Do më mungosh, mbretëresha ime!”, një dedikim që preku ndjekësit dhe komunitetin sportiv.
Kara Braxton kishte ndërtuar një karrierë të suksesshme në basketbollin profesionist, duke luajtur për disa nga ekipet më të njohura të WNBA-së gjatë një karriere që zgjati rreth një dekadë. Ajo ishte pjesë e skuadrave si Detroit Shock, Tulsa Shock, Phoenix Mercury dhe New York Liberty.
Momentet më të lavdishme të karrierës së saj lidhen me periudhën te Detroit Shock, ku nën drejtimin e trajnerit Bill Laimbeer dhe së bashku me lojtare të shquara si Deanna Nolan dhe Katie Smith, arriti të fitojë titujt kampionë të WNBA-së në vitet 2006 dhe 2008.
Performancat e saj mbresëlënëse në parket u vlerësuan edhe individualisht, duke u renditur e katërta në votimin për Lojtaren më të Mirë të sezonit në vitet 2008 dhe 2009.
Kara Braxton do të kujtohet si një sportiste e përkushtuar dhe një figurë me ndikim në basketbollin amerikan, e cila kontribuoi në sukseset e skuadrave ku luajti dhe frymëzoi shumë sportiste të reja.
