Para disa ditësh shoqata “ARSA Albania” denoncoi një rast kriminal për mënyrën e trajtimit të qenve në Pogradec. Shoqata publikoi një video në të cilën shiheshin disa qenë rruge të ngordhur dhe të hedhur në një gropë të madhe. “ARSA Albania” zbuloi se qentë ishin lënë në mes të acarit dhe se kishin ngordhur pasi i kishin lënë pa bukë për ditë të tëra. Bashkia Pogradec ishte e para që u akuzua për këtë vepër penale, pasi ajo duhet të mbajë përgjegjësi për grumbullimin dhe kujdesin ndaj kafshëve.
View this post on Instagram
Mirëpo bashkia përmes një reagimi në rrjete sociale nuk mori përsipër fajin, duke u shprehur se kjo çështje i ka kaluar prokurorisë për të zbuluar se kush e ka kryer krimin ndaj kafshëve. Bashkia Pogradec u distancua nga akti makabër, duke u shprehur se asnjë individ nuk mund të cenojë imazhin e qytetit.
Reagim!
Bashkia Pogradec ka ndjekur me shqetësim të madh të gjithë situatën e krijuar në rrjetet sociale bashkë me…
Posted by Bashkia Pogradec (Faqe Zyrtare) on Saturday, 20 February 2021
Mirëpo një ish-punonjës i bashkisë ka thënë të kundërtën ditën e sotme në një deklaratë për mediat. Ish-punonjësi, i cili është pushuar për shkak se ka ngritur zërin e ka kundërshtuar, është shprehur se bashkia i ka lënë qentë të ngordhin urie, duke mos siguruar bazën ushqimore.
“Gjatë gjithë kësaj kohe që unë kërkojë që të sigurohej baza ushqimore, këta nuk kanë dhënë asgjë tjetër përveçse 200 kile ushqim. Kam kundërshtuar dhe unë kam pasur pasoja të tjera, si paralajmërim për pushim nga puna, moszbatim urdhri, megjithatë unë sërish kam qëndruar korrekt”, është shprehur ai.
Qentë e rrugës janë grumbulluar të gjithë në një zonë në fshatin Gurras që më parë ka shërbyer si repart ushtarak dhe kushtet në të janë shumë mjerane.
Përgjegjësia penale për vrasjen e kafshëve
Një veprim i tillë, siç është rasti i qenve në Pogradec, dënohet edhe me ligj sipas kushtetutës së Republikës së Shqipërisë. Ligji nr Nr.10 465, datë 29.9.2011 “Për Shërbimin Veterinar” përcakton qartë ndalimin e keqtrajtimit të kafshëve si dhe masat ligjore ndëshkuese për rastet e keqtrajtimit.
Në nenin 76, ligji në fjalë shkruan: “Për mbrojtjen e mirëqenies së kafshëve ndalohet kryerja e veprimeve të mëposhtme: a) shkaktimi i torturës, dhunës fizike dhe verbale, sjelljes çnjerëzore, frikës, dëmtimit, dhimbjes, vuajtjes, shqetësimit ose ankthit, me përjashtim të rasteve të lejuara sipas këtij kreu”
Neni 76 vijon me një sërë ndalimesh të tjera ndërsa neni 134 me titull “kundërvajtjet administrative” parashikon gjoba për rastet e shkeljes së këtij ligji, ku për shkeljet e nenit 76 parashikohet gjobë deri në masën 100 mijë lekë të rinj.
