Prej javësh është ngritur alarmi se në vendin tonë situata nga Covid-19 është vërtetë e rëndë dhe e gjitha kjo arriti kulmin pak ditë më parë kur u shënua rekord për rastet e reja, pasi Ministria e Shëndetësisë raportoi 306 raste të reja.
Është e logjikshme që në këtë situatë, ndonëse nuk jemi mbyllur dhe vijojmë jetën normalisht, të tregohemi të kujdesshëm dhe të respektojmë rregullat e distancimit social dhe të vendosim maska në vendet publike.
Madje qeveria ka ndaluar edhe tubimet, për shkak se sipas saj grumbullimi i njerëzve në një vend bën të mundur shpërthimin e virusit, që do të çonte në vatra të reja infeksioni. Ndërkohë, maskat janë bërë të detyrueshme kudo.
Mirëpo, standardet e dyfishta vijojnë në vendin tonë kaq të çuditshëm. Aktivitete të shumta që nxisin grumbullimet janë organizuar dhe vijojnë të organizohen nga Bashkia e Tiranës çdo ditë.
Në Amfiteatrin e Tiranës u mbajt “Maratona e Këngës”, duke mbledhur dhjetëra qytetarë që nuk respektojnë rregullat e distancimit social dhe nuk mbajnë as maskat.
Jo më larg se të dielën është zhvilluar një tjetër koncert nga Elton Deda, Redon Makashi dhe Aleksandër Gjoka, sigurisht me leje nga Bashkia e Tiranës. Vlen të theksohet se ky nuk është aktiviteti i vetëm që nxit grumbullimet që lejohet nga Bashkia Tiranë.
Për më tepër, Veliaj pret çdo ditë njerëz në zyrën e tij, ku nga pamjet shihen ulur afër njëri-tjetrit, kur minimumi i largësisë supozohet të jetë 1.5 metra, edhe këta pa maska. Zyra e kreut të Bashkisë është një ambient i mbyllur dhe sipas udhëzimeve nga ISHP dhe Ministrisë së Shëndetësisë, një gjë e tillë nuk duhet të ndodhë në mënyrë absolute. Ky është apeli i përditshëm që Ministria e Shëndetësisë iu bën qytetarëve për të ulur numrin e rasteve të reja të infektuar me koronavirus në vendin tonë.
Nga njëra anë përgatisin mbylljen, nga ana tjetër nxisin grumbullimet! Bashkia e Tiranës nis vendosjen e ‘Fshatit të Festave’
Në Sheshin Skënderbej, nisi puna për montimin e shtëpizave të drurit, që çdo fundvit është njohur si ‘Fshati i Festave’. Aty u vendosën biznese të ndryshme me shërbime për qytetarët e Tiranës, për dhe ka qëndruar i hapur gjatë dhjetorit, në pritje të vitit të ri kalendarik.
Në një kohë kur kancelarja e Gjermanisë, Angela Merkel u bën thirrje gjithë gjermanëve të shmangin daljet dhe darkat në restorante jashtë shtëpisë nëse nuk është e nevojshme, Erion Veliaj i organizon mu në mes të Tiranës.
Megjithatë, për arsye ende të paditura, ato janë hequr ditën e djeshme pa asnjë shpjegim.
Duam libra, jo qofte!
Pavarësisht se grumbullimet janë të ndaluara për shkak të pandemisë, duket se për këtë rast nuk përbën fare problem. Kjo gjë ka nxitur edhe reagimin e ashpër të disa qytetarëve, të cilët nuk arrjnë të kuptojnë se si lejohet një panair i tillë, që ka në qendër ushqimet, ndërsa panairi i librit u anulua dhe do të zhvillohet online.
Në rrjete sociale ka nisur një fushatë nga lexuesit, të cilët kërkojnë që po njësoj si “Fshati i festave” të organizohet edhe Panairi i Librit.
Panairi i Librit online sepse cilësohet i rrezikshëm, ndërsa aktivitetet e Bashkisë jo!
Ministria e Shëndetësisë e cilësoi Panairin e Librit si një event të rrezikshëm për përhapjen e koronavirusit, ndaj u vendos që ai të mbahet online. Të gjithë botuesit shqiptarë e kanë cilësuar këtë gjë si një sfidë të madhe për ta e lexuesit dhe ende nuk ka një plan të mirëfilltë se si do të mbahet Paniri i Librit online. Deri më tani dihet se do të ketë një platformë online për blerjen e librave dhe disa ekrane të mëdhenj nëpër kryqytet që do të pasqyrojnë eventet, por gjërat nuk janë shumë të qarta. (Kliko)
Panairi i Librit do të zgjasë vetëm 4 ditë (12-15 nëntor), ndërkohë që “Fshati i Festave”, ku mblidhen mijëra njerëz çdo ditë, do të zgjasë plot dy muaj. Si ka mundësi që ky i fundit nuk është i rrezikshëm për përhapjen e Covid-19, ndërsa Panairi i Librit është? A nuk mundej që Panairi i Librit të zhvillohej në një ambient të hapur njësoj si “Fshati i festave”? Sigurisht që mundej, por rregullatnë vendin tonë ndryshe shkruhen e ndryshe zbatohen kur vjen puna tek interesat e pushtetit!
Në këtë mënyrë vendoset në rrezik i gjithë shëndeti i qytetarëve dhe sakrifica jonë 2 mujore që kaluam në karantinë. Padyshim që rikthimi i festës dhe jetës në kryeqytet ka vlerë dhe është i rëndësishëm, por jo i domosdoshëm. Sidomos në këtë situatë, kur gjendja duke më alarmante se në fillim të epidemisë dhe shifrat po rriten çdo ditë edhe më shumë.
