Reperi Jay Z është i pari artist hip-hopi që hyn në “Songwriters Hall of Fame”.
Kjo është padyshim një arritje pasi në “Songwriters Hall of Fame” bëhen pjesë vetëm tekstshkruesit më të mirë dhe asnjë reper më parë nuk është nderuar me një çmim të tillë.
Për të prezantuar Shawn Carter (emri i vërtetë i Jay Z) është përzgjedhur ish-presidenti i Shteteve të Bashkuara të Amerikës, Barack Obama.
Në një video-mesazh, Obama shprehet:
“Unë dhe Mr. Carter e kuptojmë shumë mirë njëri-tjetrin. Dikush që na ka takuar kur ishim të rinj, nuk do ta besonte që ne do të bëheshim ata që jemi sot. Të dy e dimë çfarë do të thotë të mos kesh një baba rreth e rrotull. Të dy vendosëm të hapnim dyert e suksesit, pavarësisht se mbylleshin vazhdimisht”.
Më pas, ish-presidenti nuk ka harruar të përmendë edhe bashkëshortet përkatëse por duke i shpëtuar pak goja për gjininë e dy binjakëve që pret Beyonce:
“Jay dhe unë jemi të marrosur pas vajzave tona, ndonëse ai do të më mundë sapo të shfaqen binjaket. Dhe le ta pranojmë…bashkëshortet tona janë më të njohura se ne”.
Mos ndoshta Beyonce do të bëhet me dy vajza!
