Studentët vijojnë të protestojnë përpara Ministrisë së Arsimit në lidhje me kërkesat e tyre dhe nuk ndalen derisa të plotësohen! Por atyre iu bashkuan ditën e sotme edhe protestuesit e zonës së “Astirit”, të cilët prej një muaji po protestojnë për shembjen e shtëpive, pasi preken nga projekti i “Unazës së Madhe”.
Duket se studentët nuk e kanë mirëpritur këtë fakt dhe mes tyre ka pasur përplasje! Sipas studentëve, në protestën e tyre përpara Ministrisë së Arsimit nuk luftohet për tjetër kauzë. Ndërsa banorët shprehen se janë aty për të mbështetur studentët.
“Unë kam ardhur edhe si studente edhe për kauzën tjetër. Emocionohem (qan) se nuk na lënë të shprehim fjalën tonë, edhe shtëpia do më prishet, jam edhe studente. Unë jam për të dyja anët” – u shpreh studentja, shtëpia e së cilës preket nga projekti i “Unazës së Madhe”.
“Unë po lë gjakun tim për këtë gocë për ta shkolluar, për ta bërë një fëmijë të denjë për këtë vend. Nuk do protestoj si banorë, por si babai i një studentje” – u shpreh i ati i vajzës.
Sakaq, protesta e studentëve është duartrokitur edhe nga qytetarët në rrugët e Tiranës!
