“Fuqia e njerëzve është më e madhe se njerëzit në fuqi”, kjo është një nga banderolat që mbajnë në duar banorët e “Unazës së Re”.
Prej nëntë ditësh ata protestojnë për mbrojtjen e banesave të tyre, të cilat do të shemben për ndërtimin e projektit të Unazës së Madhe.
Ditën e sotme protesta e tyre u zhvendos para Bashkisë së Tiranës, për të kërkuar një takim me kryebashkiakun Erion Veliaj.
Fillimisht uniformat blu kërkuan që protestuesit të largoheshin, pasi nuk kishin marrë leje për tubimin, por më pas u tërhoqën nga këmbëngulja e banorëve.
Këta të fundit shprehen se deri më tani nuk kanë marrë asnjë përgjigje lidhur me dëmshpërblimet, ndërsa shtojnë se shteti po i nxjerr në qiell të hapur.
Përfaqësuesi i protestës tha se banorët duan dëmshpërblim 100%, ndërsa i bëri thirrje kryeministrit dhe qeverisë:
“Këta fshihen, se tani janë zgjedhjet. Ne kemi qenë të ligjshëm deri dje, ndërsa sot na shpallin të paligjshëm. Ne duam 100% dëmshpërblim dhe ata që kanë dokumente dhe ata që nuk kanë. Se kanë investuar 25 vite në ato banesa. Projektin le ta bëjnë si të duan ata. Ne jemi për negociata, s’jemi vandalë. Vijmë tek Bashkia e Tiranës se jemi qytetarë të Tiranës dhe kemi votuar për këtë qytet. S’kemi kërkuar kurrë ndihmë. Këta po mundohen që të tregohen arrogantë. Kryeministri duhet të tregohet arrogant me ata që na përdhunuan në Bularat dhe jo me ne. Unë dhe këta banorë nuk duam që ta lëmë vendin. Ne nuk tërhiqemi. Për dy gjëra jeton njeriu; për nder dhe shtëpi. Shtëpitë tona nuk do të gremisen”.
Burimi: BalkanWeb
