Ekonomia e Shqipërisë do të jetë më e rrezikuara pas dëmeve financiare që ka shkaktuar pandemia.
Monitor.al raporton se borxhi publik i vendit tonë rrezikon të rritet me 11 pikë përqindje të Prodhimit të Brendshëm Bruto (PBB), sipas një studimi të fundit të Bankës Botërore mbi efektet që do të ketë pandemia në vendet me të ardhura të mesme.
Shqipëria përfshihet në 15 vendet që rrezikon rritje të madhe të borxhit ndër 106 vende me të ardhura të mesme. Borxhi publik arriti në 65.8% të PBB-së në fund të vitit 2019, por sipas analizës së Bankës Botërore, pandemia do ta çojë këtë tregues në 76.8% të PBB-së.
Për më tepër, Shqipëria ka borxhin më të lartë në rajon, shumë afër kufirit që FMN rekomandon për vendet në zhvillim rreth 60% të PBB-së, ndërsa ka ezauruar tërësisht hapësirën fiskale, pasi ka përqindjet më të larta të tatimeve dhe taksave në rajon.
Monitor.al shkruan se sipas të dhënave zyrtare nga Ministria e Financave, vjet në këtë periudhë, balanca buxhetore ishte me 400 milionë lekë plus, por pandemia e ka ndryshuar situatën, për shkak se të ardhurat kanë rënë me ritme të forta nga parashikimet fillestare.
“Rënia e të ardhurave e shoqëruar me shpenzime të njëjta si në vitin e kaluar, ka çuar deficitin buxhetor në janar-maj në -26 miliardë lekë. Me rishikimin e buxhetit në qershor, Ministria e Financave pret të zgjerojë deficitin buxhetor në nivelin në -5% të PBB-së”, thuhet më tej.
Edhe në raportin e fundit të Bankës Europiane për Rindërtim dhe Zhvillim (lexo këtu), parashikohej se ekonomia shqiptare këtë vit do të pësojë goditje të madhe si pasojë e pandemisë së koronavirusit.
Goditja do të vijë si pasojë e mungesës së turizmit, në të cilin Prodhimi i Brendshëm Bruto do të bjerë me 9%. Kjo goditje pritet të ketë një ndikim afatgjatë shoqëror, ndërkohë që 2020 thuajse llogaritet si viti zero në ringritjen ekonomike.
/Monitor.al
