Ndërkohë që ai po dëshmonte kundër deputetit socialist Taulant Balla, djali i tij ndodhej pas hekurave të qelisë.
Sali Lushaj, ish-truproja e ish-kryeministrit Sali Berisha, reagoi dy ditë pas arrestimit të të birit Arkimed, i njohur me emrin e artit Stresi.
Në statusin e tij në “Facebook”, Lushaj e cilëson arrestimin e reperit si një hakmarrje pas padisë së tij ndaj deputetit Taulant Balla. Ai thekson se ky regjim nuk do ta mposhtë atë dhe familjen e tij, ndërsa i kërkon Stresit të mos dorëzohet.
Postimi i plotë
Përshëndetje miq! Besoj po shikoni e dëgjoni ca përralla që na tregonin dikur gjyshja ose gjyshi. Ka dy ditë që ky pushtet po merret me djalin tim Stresi. Çdo gjë e sajuar. Çdo gjë e përgatitur nga mllefi që u tërbuan, që unë i bëra Ballës një padi në Gjykatë.
Këta filluan të hakmerren brenda 12 orësh. Aspak e vërtetë se qenka grup kriminal. Një shpifje e fëlliqur. Askush nuk është ndaluar tjetër e s’do të dalë në këtë lojë të fëlliqur e të përgatitur.
Grup kriminal i madh shumë pa asnjë tjetër. Por ne kurrë s’do të mund të na thyejnë e të na përkulin para këtij regjimi të fëlliqur. Ne kemi duart e ky regjim ka hekurat. Kurrë s’do më mposhtin mua e as familjen time. Vetëm dua t’i them djalit tim mos u dorëzo para këtyre falangave, se jemi të fortë.
Kënga që ke kënduar “Mos u dorëzo” kjo është. Ti për mua je gjëja më e shtrenjtë se linde në internim dhe me gjithë ato vuajtje s’mu ndave nga bindjet e mia por më mbështete deri në këto momente dhe ne do të mbështesim e do jemi me ty. Të duam fort.
