Albana Osmani publikoi pak ditë më parë librin e saj të parë “Çika në betejë me inteligjencën artificiale”. Moderatorja e njohur punoi fort për librin, duke u kujdesur jo vetëm për historinë, por edhe për ilustrimet brenda tij. Ajo i pikturoi të gjitha vetë me dorë, për të ndërthurur në këtë formë të gjitha pasionet e saj.
E ftuar së fundmi në emisionin “Abc e Mëngjesit”, Albana ka treguar se kush e ka marrë i pari në dorë librin e saj. Ajo tha se ka qenë i ati që e ka lexuar i pari, sepse ai e ka pritur me padurim publikimin.
“Lexuesi i parë ka qenë babai im. E mori me shumë seriozitet, pasi unë rrija me netë të tëra me laptop derisa erdhi një pikë që unë nuk dilja me prindërit e mi për kafe dhe babi më tha kur doli: ‘Më në fund ta lexojmë një herë’.
Unë kam shkruar herë pas here copëza dhe nuk e dija që do arrija të shkruaja një libër fanta- shkencë. Nuk pata besim te vetja dhe kanë qenë adhuruesit që më kanë shtyrë.
Unë i kam qëndruar çdo gjëje në kokë. E kam ndjekur në çdo detaj vetë deri te kapaku blu. Unë u mbylla në shtëpi 40 ditë si izraelitet dhe realizova ilustrimet me ndihmën e shokut tim të liceut, Gëzim Dhima”, u shpreh Osmani.
