Vrasja e Liridona Murselit, tronditi vendin ditën e djeshme. Avokati Arbër Jashari ka postuar në Facebook një status, ku ngre dyshimet se vrasja ishte e planifikuar.
Sipas informacioneve që janë deri më tani, dihet që, Liridona Murseli teksa ishte duke udhëtuar me bashkëshortin dhe fëmijët, është ndaluar nga një grabitës.
Ai i rrëmbeu asaj portofolat dhe telefonat dhe më pas qëlloi me armë zjarri drejt makinës, ku për fat të keq plumbat kapën Liridona Murselin duke humbur jetën në vend.
Arbër Jashari tha se grabitësit nuk kanë si qëllim të sulmojnë qytetarët që udhëtojnë me makina, por institucione si banka apo biznese me sende me vlerë si argjendaritë. Avokati është shprehur që grabitësit qëllojnë vetëm në momentet që ata ndihen të rrezikuar, por ajo që habit dhe vë në dyshim është që si grabitësit të jenë frikësuar nga një grua?
Shkrimi i plotë:
Pse akti i mbrëmshëm kriminal në Prishtinë, më shumë ka karakteristikat e një vrasje të planifikuar se sa grabitje? Grabitësi nuk grabitë vetura private, sepse ai nuk rrezikon për pak. Grabitësit zakonisht kanë target bankat, veturat që kanë para, bizneset qe kanë shumë qarkullim (marketet, pikat e karburanit etj.), vendet që kanë gjera me vlerë (ari për shembull.)
Grabitësi e di, që sot njerëzit nuk mbajnë shumë para me vete, e as shumë stoli ose gjëra tjera të çmuara. Është e pabesueshme qe grabitësit marrin telefona.
Grabitësi nuk ka qëllim vrasjen. Ai qëllim primar ka të ushtroj frikë në mënyrë që ta marr plaçkën. Grabitësi vret vetëm kur i rrezikohet jeta ose zbulimi i identitetit. Është pak e besueshme që grabitësit të jenë ndjerë të rrezikuar, e sidomos nga një grua.
Uroj që ky rast të zbardhet shpejt.
