Prej vitit të ardhshëm do të duhet të paguani një taksë nëse udhëtoni me automjet në autostradën Tiranë-Durrës.
Ndërsa nuk ka një lajmërim publik nga Ministria e Infrastrukturës, burime për “Top Channel” thonë se ofruesi është një grup i madh indian, i cili ka disa koncesione autostradash në Azi, por që në Shqipëri është i përfaqësuar nga dy kompani lokale, Albstar, e cila po ndërton stadiumin Arena kombëtare, si dhe kompania Trema Inxhiniering.
Nga studimi që është bërë parashikohet që të vendosen dy tarifa. Për automjetet e vogla do të paguhet 2 euro për çdo kalim, ndërsa për automjetet e mëdha tarifa do të jetë 5 euro.
Në projekt është parashikuar që autostrada të zgjerohet me dy korsi të tjera, si dhe do të sigurohet rrugë alternativë kalimi pa pagesë.
Bëhet fjalë për rrugën e vjetër Tiranë-Ndroq-Plepa, e cila do të rikonstruktohet po nga kompania private.
Në projektbuxhetin e vitit 2019, qeveria ka vënë si vlerë tavan për këtë koncesion shifrën 49.1 miliardë lekë ose rreth 380 milionë euro.
Dhënia me koncesion e rrugës Tiranë-Durrës është ende në fazë projekti, ndaj ende nuk ka një një njoftim zyrtar nëse do të pranohet oferta e kompanisë koncesionare.
Burimi: TCH
